Энд билгтә баһчуд сурна

31-05-2021, 15:08 | Таңһчин зәңгс » Сойл

Элст балһсна талвңд хөн сарин 29-д асхн Долан хонгин күрәлһн гидг сәәхн бәәрнә өөр олн улс цуглрв. Энд П. Чонкушовин нертә билг-эрдмин колледж 60 җилә өөндән нерәдсн концерт үзүлв. Сурһулин эн бүрдәциг төгсәсн болн ода энд сурчах баһчуд хотл балһсна әмтнд билг-эрдмән нерәдв.

60 җилин туршарт колледжин үүлдврт кесг хүврлт учрсмн. Цагин йовуд дахад, олн шинрлт орулгдҗ, шин эрдм чигн энд дасхдг болв. Зуг юн эс учрв чигн һол үүлдврнь тер кевтән үлдснь ончта. Таңһчин үүдәгч коллективсин төлә артистнр, биичнр, дуучнр, нань чигн мергҗлтнр белддг һол төрән сәәнәр күцәҗ йовна.
Таңһч шинәс тогтад, босхмҗин көдлмш эклсн цагт көгҗмин училищ секгдснь сойлын җирһлд йовуд өгснь лавта. Таңһчд сойл делгрүлх, өвкнрин билг-эрдмиг цааранднь өскҗ-өргҗүлх кергтәһинь медҗ тиим шиидвр авгдсмн. Таңһчин правительствин ахлачин дарукнь болҗ көдлҗәсн Бадмин Алексейин седвәрәр болн шунлтар сурһулин эн бүрдәц секгдсинь ветеранмуд тодлна. Алексей Урубжуровичин һардврт цуг кергтә тоотнь белдгдҗ, эрдм дасхх багшнр таңһчур ирҗ, училищ секгдсн бәәҗ. Цөөкн һол эрдмәр түрүн авгтан эдн белдвр кегдҗәсн болхла, ода 16 эрдмәр мергҗлтнриг белднә.
Байрта болн сергмҗтә, олн баһчуд орлцата композицәр концерт эклв. Шуугад, ниргәд цуглрсн улст колледжин җирн җилин өөнин тускар келҗ, өдгә цагин бииһин дөңгәр сәәхн медүлв.
Хальмг Таңһчин Хуралын (Парламентин) нерн деерәс йосна эн органа ахлачин дарук Нуура Николай үнн седкләсн йорәв. Таңһчин правительствин нерн деерәс колледжин коллективиг правительствин ахлачин дарук Иванован Светлана йөрәв.
Бурхн Багшин Алтн сүм болн Элстин болн Хальмгин епархий колледжин багшнрт болн оютнрт йөрәлән илгәһәд, оюни чинртә зургуд белглҗ, үүлдвртнь күцәмҗ дурдсинь цуглрсн улс ик байртаһар тосв.
Эн җилмүдин туршарт сурһулин бүрдәцд оютнриг хамцулдг олн сән авъясмуд батрв. Энд ирҗ сурснасн авн оютнр багшнрин һардврт таңһчин сойлын җирһлд шунҗ орлцдг болна. Таңһчин райодар болн селәдәр һарч йовхдан эдн дурта. Дассн тоотан үзүлсн деерән тиигҗ, колледжин тускар келҗ өгч, энд сурх баһчудт үлгүр-үзмҗ болна. Таңһчин регионмуд хоорндк, Цугәрәсән, нарт-делкән олн марһанд болн һәәхүлд колледжин оютнр орлцна. Шидр Пермьд болсн Дельфийск нааднд орлцад, колледжин һурвн оютн лауреатнр болад, цаһан мөңгн медаль авч ирсмн. Теднә негнь – Муукан Санл, домбрт хальмг улсин айсмуд цокҗ, цуглрсн әмтнә зүркинь бульглулв.
Оютн Гарян Екатерина болн Хальмгин ачта артистк Босхмҗин Диана хамдан дуулсн «Үснә гилгр» гидг улсин дун кесгтән талвң деер нисч, байр әмтнд үүдәв. Ду, би, көгҗм хоорнд концертиг һардҗ йовулҗасн Гадана Наталья цуглрсн улст колледжин әңгүдин тускар, энд сурсн билгтнрин тускар тодлулҗ келәд, тууҗлань таньлдулв.
Цагтан энд көгҗмин эклц сурһуль авсн, хөөннь Москвад көгҗмин ик сурһуль төгсәсн Катан Савр ода колледжд оркестр бүрдәсн, олн оютнриг таңһчин көгҗмин җирһлд орлцулҗана. Хальмг Таңһчин билг-эрдмин үүлдәч Катан Саврин һардврт бәәдг оютнрин оркестр П. Чонкушовин болн нань чигн көгҗмин үүдәврмүдиг татад, эн халхар таңһчд делгрлт уралан девшҗ йовхиг үзүлв.
Цевгә Төлә, Кулеша Лидия, Нәдвдә Петр, Манжика Галина болн нань чигн нертә артистнрин нерн сурһулин эн бүрдәцин үүлдврлә залһлдата мѳн. Хальмгин нертә дууч Цеднә Зоя олн җилд энд баһчудт дууна эрдм дасхч йовсмн. Энүнә һардврт сурсн, ода Хальмг Таңһчин ачта артистк Ангелина Серова парнцс келәр дуулсн дууг әмтн таасҗ тосв.
Цевгә Төлән нертә Государственн хор чигн эн асхнд орлцв. Эн коллективин ик зунь колледжиг цагтан төгсәсн баһчуд болҗана.
Теднә негнь дууч Брюгидикә Айса өргҗ дуулсн дун талвңгиг дүүргҗ, әмтиг сергәв.
Тәәз деер Хальмг Таңһчин ачта артистк Очкан Анна оютнрин оркестриг дахҗ дуулв. Манҗин Аркадийин болн Хавтхан Викторин «Музыка Элисты» гидг дун әмтнә оньгт тусхагдв.
Колледжин hардач, Хальмг Таңһчин сойлын ачта көдләч Гарян Любовин келсәр, сурһулин бүрдәцд таңһчин билг-эрдмиг цааранднь делгрүлх билгтнр сурчана. Көгҗмәр дүүрң герт сурсн олн мергҗлтнр ода сойлын цуг бүрдәцсәр көдлҗәнә. Элстин колледж төгсәсн көгҗмчнр, артистнр, дуучнр, биичнр, нань чигн билгтнр эндр Әрәсән кесг һазрар, һазадын орн-нутгудар көдлҗ йовна. Улсин зөөрән хадһлҗ, таңһчин нериг цааранднь чигн өөдән бәрҗ йовх баһчуд энд сән сурһмҗ болн медрл авчана. Тиигәд тәәз деер оютнр, нертә артистнр, көгҗмчнр нег-негән сольҗ, билг-эрдмән әмтнд нерәдв.

УШКАНА Сувсн

Видео