Билгтә баһчудыг йилһҗ ачлв

Шидр Элстд «Хамдан» нертә билгтә баһчудын таңһчин марһан арвн тавдгч кемдән болв. Әрәсән улсин ниицлтин җиллә ирлцҗ эн марһана көтлвр бүрдәгдснь темдгтә.
Моһа сарин 18-д Манҗин Аркадин нертә Хальмг филармоньд таңһчин билгтә баһчуд цуглрв. Тенд марһана дииләчнриг ачлҗ йөрәв. Ашлгч девсңгин концерт Әрәсән ханьд Крым Республик болн Севастополь балһсн орсн сән Өдрлә ирлцв.
Марһана йовудт дорас өсч йовдг баһчуд хоорндан таньлдад, олн үүрмүдән олад, төрскнч седклтә, чик сурһмҗта, өвкнрин зөөрән хадһлҗ, таңһчин хәәртә үрд болҗ өсчәхән медүлв.
«Хамдан» марһан-наадмд 200 һар көвүн-күүкн орлцв. Таңһчин хол райодас ирсн элчнрт Элст балһсна гиичлүрмүдт шишлң ормс йилһгдв. Темдглхд, марһан-наадмин көдлмшиг цугинь баһчуд эврән бүрдәҗ һардв.
Шидр үүлдән орсн таңһчин сойлын болн зуульчллһна министр Бембин Евгений керг-үүлдвриг секв.
– Күндтә гиичнр, мана дорас өсч йовдг хәәртә баһчуд, иим чинртә марһан-наадмд орлцҗахнь чик йовдл мөн. Тадн цуһар төрскнч седклтә, чик авг-бәрцтә улс болҗанат. Цааранднь аавнр-ээҗнриннь үлдәсн байн сойлын зөөриг хадһлад, тархаһад йовтн, – гиҗ Евгений Владимирович баһчудт күцәмҗ дурдв.
Онц темдглхд, эн җилин «Хамдан» марһан-наадмд Луганск Улсин Республикин Антрацит балһснас «Муза» нертә дууна баг ирҗ орлцв. Энүнә һардач Елена Шапулан келсәр, эн эврән Хальмгт түрүн болҗ ирв. Багин күүкд болхла нидн зунар Яшалтан района «Лесная сказка» лагерьт амрад, сергмҗтәһәр цаган давулсиг тодлулв. «Крымск хаврин» байрла концерт ирлцснь эн бас темдглв. Олн келәр дуулад, бииһән бииләд, мана алдр орн-нутгин сойлын зөөриг хадһлҗ йовнавидн, гиҗ гиич тоолврарн хувалцв.
Байрин концертин чилгчәр цуһар һаза һарч Хальмг филармоня герин өмн Әрәсән туг делскв. Нег һазра мана баһчудыг болн гиичләд ирсн ЛНР-ин Антрацит балһсна элчнриг эн йовдл негдүлв. Әрәсән орн-нутгт олн келн-улс ниитәһәр бәәхиг эн керг-үүлдвр дәкн олнд медүлсн болдг.
ОЛЬДАН Цаһан