«Крымск хавр» – Хальмгт

Сегодня, 14:57 | Общество, Таңһчин зәңгс, Зіњг, Сойл

Крым Әрәсән ханьд орсн цагас авн 12 җил давв. Ода эн тоха арл болн Севастополь балһсн Әрәсән ни-негн бүлд делгрлтин хаалһд йовна. «Крымск хавр» нертә керг-үүлдвр Хальмг Таңһчд бас болв. Моһа сарин 18-д Диилврин паркд тууҗлгч чинртә эн йовдлд нерәдгдсн концертд олн улс цуглрҗ ирв. «Мана Крымск хавр» гидг байрин керг-үүлдвр эдниг Хамцулв.
Цеңкр сәәхн теңгр, шар нарна герл келн-улсин байриг улм герлтксн болв. Наста әмтн, «Молодая гвардия» җисәнд орлцачнр халун цәәһәр болн боорцгар тооҗасн һазрур темцв. Иигәд элстихн седклин сән таалд хаврин эн байриг темдглв.
Диилврин паркин талвңд СВО-н ветеранмуд, олна, сойлын бүрдәцсин, келн-улсин сойлын төвмүдин, баһчудын негдлтсин, волонтерск җисәнә элчнр цуглрҗ ирв. Мана таңһчд олн келн-улс ни-негн бәәнә. Хальмгт үүлддг келн-улсин сойлын болн олна ниицәсин элчнр йөрәлин үгдән Крым Әрәсән ханьд орсна чинртә йовдлын хамцулгч ончинь темдглв. Әрәсән Президент Владимир Путинә келн-улсиг негдүллһәр кеҗәдг ик чинртә көдлмшиг дөңнҗ, Әрәсән болн Крымин хоорнд тууҗин хол цагас авн бат залһлдан бәәхинь иткүлв.
«Эндр байрта өдр болҗана. Крым Әрәсән ханьд орсн өдриг бидн хамдан темдглҗәнәвидн. - гиҗ «Хальмгин корейцнрин негдлт» гидг олна ниицәнә ахлач Улана Наталья келв. - Эн җил авъяс болсн байрин өдр Әрәсән улсин ниицлтин җилд кегдҗәхнь нег үлү чинртә болҗана. Мана ни-негн үүлдврин болн хамцу шунлтын болн иргч күцәмҗин ул болҗана».
Улсин негдлтин эн харһлтд СВО-н ветеранмуд Мингиян Нахошкин болн Евгений Тобомбаев орлцснь цуглрсн улсин оньгиг эзлв. 2014 җилин моһа сард Крымд болҗасн хүврлтсин үүлдвр әәмшг угаһар давхд Евгений туслҗ үүлдсмн. Дарунь тенд меҗә харлһнд Мингиян Нахошкин бас орлцсмн. Хөөннь эн хойр көвүн шишлң цергә керг-үүлдврт орлцсн болдг.
Әрәсән ни-негн бүлд бәәдг олн келн-улсин элчнр байрин эн өдр ниитә седклән медүлв. Корейск, ногайск, дагестанск, хасг, нань чигн келн-улсин негдлтсин нерн деерәс цуглрсн улст нерәдсн йөрәлин үгмүд соңсгдв. Олна үүлдәч Аслудин Калабеков Крымин әмтн эврә сән дурарн Әрәсән ханьд орҗасн цагт шаҗна эн үүлдәч Крымд одад, тенд крымск маңһдла харһад, негдлһнә йовуд эвәр давхд орлцсн бәәҗ.
«Бамб цецг» ансамблин дууч Эрднь-Һәрән Амулң «Надежда» гидг дууһар байрин концертиг эклв. Кен- чигн күүнә седклд бәәх ицлиг медүлҗ, дән уга делкәд, ни-эвәр бәәх әмтнә санан-седкл дууна дөңгәр улм батрсн болв. Дәәнә болн күч-көлснә ветеранмудын улсин дууна коллективин дуулсн дун әмтнд омг өгв.
Олн хәләврмүдин дииләч, тер тоод Сочи балһснд болсн «Золотой Орфей» марһана дииләч Тимофей Ивенко «Мини Әрәсә» гидг ду дуулснь цуглрсн улсин седкл авлв. Шүлгүд умшлһарн нер һарчадг бичкн билгт, Элст балһсна 4-ч тойгта дунд сурһулин сурһульч Улана Артур эн өдр цуглрсн улсиг икәр өврүлв. Әрәсән туск шүлгиг зальта кевәр умшсн деерән эн көвүн мана ик нутгин тускар өргмҗтәһәр дуулсинь әмтн уданд альх ташҗ дөңнв. «Бамб цецг» ансамблин артист Окна Климентий дуулсн «Джунгария» дун дөрвн зун җил хооран хальмгуд Әрәсән ханьд орҗ, Иҗлин көвәд бәәршсн цагас авн орс болн хальмг улсин тууҗ болн хөв-кишг негдсиг тодлулв.
Хальмг симфоническ оркестрин дууч Дорҗин Лиҗ дуулсн «Легендарный Севастополь» гидг дун Әрәсән келн-улсин хамцу үүлдврин болн диилврин тууҗиг сергәсн болв.
Очра Геннадий толһалҗадг «Союз СВОих» дууна багин дун әмтиг соньмсулв. Бийнь Геннадий дәәчнрин тускар хальмг ду дуулад, Мазн баатриг болн Хальмгин зөргтә нань чигн үрдиг магтсн болв.
Крымск хаврт нерәдсн байрин керг-үүлдвр таңһчин цуг улсин ниицлтин байрт хүврв.
Әмтнә тоолвр
«Крымск хавр» – Хальмгт
Михаил БОГАТОВ,
Хальмг Улсин Хуралын (Парламентин) депутат:
- Би Крымд 2014 җилд одлав. Тенд цугнь нурҗ одсинь үзләв. 12 жилин эргцд Әрәсә тенд шинрлтин аһу ик көдлмш кев. Тоха арлын цуг эдл-аху болн олна хамг тоот шинрүлгдҗ ясгдв. Эндр Крым Әрәсәд өргнәр делгрҗәдг регион болҗана.
Хамгин чинртәнь эн һазрт бәәдг цуг келн-әмтн әдл зөвтә болв. Йосна һурвн келн энд батлгдв. Олн келн-улс ни-эвәр бәәдг мана таңһчд кен-негән күндлҗ бәәлһн йирини йовдл болҗана.
«Крымск хавр» – Хальмгт
ДОРЖИН Санл,
«Инициатива» баһчудын төвин һардач:
- Эндр йоста хамцлтын байр мөн. Энд ик-бичкн уга цуглрсмн. Тиигчкәд таңһчд бәәдг олн келн-улсин элчнр, баһчуд олар ирснь нанд нег үлү таасгдв. Таңһчан уралан йовулх баһчуд олна үүлдврт орлцад ах үйн үлгүр үзҗ, дамшлт авчана.
«Крымск хавр» – Хальмгт
ДОРҖИН Алина,
«Молодая гвардия» җисәнд орлцач:
- Таңһчд болн Элстд болҗадг олн керг-үүлдврт мана җисән орлцна. Таңһчин әмтн цугтан амулң-менд бәәтхә, дән бичә үзгдтхә гиҗ бидн дурдҗанавидн. Эндр бидн нааран ирсн әмтн сергмҗтәһәр цаган давултха, гиҗ цугинь кеҗәнәвидн. Таңһчин делгрлтд күн болһн орлцх зөвтә. Иргч җирһл теткх улс баһчуд болҗахинь бидн медҗәнәвидн.
ХӨӨЧИН Галина

Видео