Бичкдүд сергмҗтәһәр амрхин төлә

10-06-2021, 10:01 | Общество, Зіњг

Урҗ өдр мана таңһчд бичкдүдин амрлһна лагерьмүд үүлдврән эклв. Элст балһснд эн җил 19 сурһулин бүрдәцин болн бичкдүдин үүдәлтин бәәшңгин улд 20 лагерь секгдв. Ут тоодан 2787 күүкн-көвүн тенд цогц-махмудан батрулҗ, сергмҗтә кевәр амрхмн.

Элст балһсна һардврин толһачин дарук Васькинә Галинан келсәр, өдрәр үүлддг лагерьмүд секхин төлә белдврин ик көдлмш күцәгдв. Давсн җилд коронавирусн гемәс иштә хаслһна диг-даран зарлгдад лагерьмүд секгдсн уга. Эн җил санитарн некврмүд күцәгдҗ бичкдүдин төлә саглуллһна керг-үүлдврмүд батлгдҗ лагерьмүд секгдв. Эпидемиологическ бәәдл учртан авгдҗ бичкдүд нурһлҗ һаза бәәхмн, эдн цевр аһар киилҗ олн-зүсн керг-үүлдврмүдт орлцхмн. Лагерьмүдиг белдсн цагт шалзас хөрлһнә кергт ик оньг өггдв, сурһулин бүрдәцсин эргндк һазр эд-бод кегдв. Эн җил хотл балһснас 5727 күүкн-көвүн зуни амрлһна кемд цогц-махмудан батрулхмн. Бичкдүд сурһулин улд өдрәр үүлдх лагерьмүдт амрсн деерән райодт бәәдг стационарн лагерьмүдт бас одҗ чадх, – гиҗ Галина Васильевна келв.
Зая-Пандитын нертә этносойлын гимназин улд секгдсн лагерин үүлдвр хальмг улсин «Җаңһр» дуулврт нерәдгдв. Лагерин болн отрядмудын нерд, дуудвр болн частр дуулврла залһлдата. Энд амрчах сурһульчнр хальмг улсин амн үгин зөөрлә таньлдҗ, дуулврин тасрха, үлгүрмүд, цецн үгмүд болн йөрәлмүд хальмг келәр дасхмн. Энд тод бичгин, хальмг бииһин болн дууна кружокмуд үүлдхмн. «Бумбин орн. Җаңһрин ачнр» гиҗ нерәдгдсн лагерьт олн үртә болн баһ тетквртә өрк-бүлмүдт асргдҗах 200 күүкн-көвүн орҗана. Бичкдүд өдр болһн спортивн, билг-эрдмин марһаст орлцхмн, һаза наадхмн. Сурһулин көдләчнр эднә төлә соньн көтлвр белдсн бәәнә, тегәд бичкдүд сергмҗтәһәр амрсн деерән шин медрл хоршаҗ цаган тустаһар давулхмн.
Лагерин һардач, хальмг келнә багш Нимән Айнан келсәр, сурһулин җил амр биш болв, тегәд күүкд-көвүд зуни амрлһна кемиг сергмҗтәһәр давулх зөвтә. Пандемийин таалд сурһуль сурхд амр биш болв, тегәд бичкдүд сәәнәр амрад, зуни сармудт чидл урһаҗ авхла эдн сурһулян сәәнәр сурхнь лавта гиҗ багш келнә.
Зуни сармудт сурһульчнр лагерьмүдт амрсн деерән көдлҗ чадхмн. Тиигәд, Элстин 915 сурһульч эврә сән дурар үүлддг отрядмудт орлцҗ, сурһулин бүрдәцсин эргндк һазр ахулҗ, урһа модд суулһлһна көдлмшт орлцхмн. Эднд муниципальн болн таңһчин шаңһас йилһсн мөңгәр җалв өгхмн. Хамгин түрүнд гемтә-шалтгта, җирһлин күнд таалд туссн болн баһ тетквртә өрк-бүлмүдин бичкдүд цаг зуур көдлмшәр теткгдв.
Хальмг Таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан зәңглсәр, эн җил 1630 сурһульч цаг зуур көдлмшәр теткгдхмн, теднәснь 430 күүкн-көвүн хаврин амрлһна кемд көдлв. Бичкдүд дегтрин саңд, сән кец-таал тогтадг бүрдәцст дөңгән күргхмн. Эдн олсн мөңгәрн сурһульд кергтә эд-тавр хулдҗ авч чадхмн.
ДАВАН Наталья

Видео