Багшнрин чинр өөдлүлхәр

30-06-2022, 12:03 | Общество

Шидр Әрәсән Президент Владимир Путин 2023-ч җилиг багшин болн дамшачин Җил болхиг зарлсна туск зәрлг батлв. Сурһуль-эрдмин көдләчнрин болн дамшлтарн хувалцҗ үүлддг улсин чинр өөдлүлх күслтәһәр иим шиидвр авгдсмн. Орн-нутгин Толһач Әрәсән Залврт һурвн сарин эргцд багшин болн дамшачин Җил давуллһна бүрдәмҗин комитет тогтах болн терүнә гешүдиг батлҗ, һоллгч керг-үүлдврмүдин зура белдх даалһвр өгв. Тер мет региональн йосна органмудт багшин болн дамшачин Җилд нерәдгдсн керг-үүлдврмүд батлх сүв-севлг өггдв.

Орн-нутгин Федерацин Советин Ахлач Валентина Матвиенко Әрәсән Президентин шиидвриг дөңнҗ, багшин эрдм тоомсрта болн күндтә болх зөвтә гив. Мана орн-нутгт багш олн дунд тоомсрта күн бәәсмн, терүг цуһар күндлҗ тевчдг билә. Тегәд тер авъясиг сергәх зөвтәвидн, багшин эрдмиг баһчуд шүүҗ авхин төлә терүнә чинриг өөдлүлх кергтә. Бидн эн төриг хаһлҗ чадхвидн, гиҗ Валентина Матвиенко темдглв.

Давсн җил Әрәсәд номин болн технологин Җил гиҗ зарлгдсн билә. Тегәд номин, шин эв-арһсин болн сурһуль-эрдмин делгрлтин төрмүдт орн-нутгин һардвр ик оньг тусхаҗахнь эн халхд үүлдҗәдг улст ик урмд өгчәхнь лавта. Нег үлү баһ наста номтнрт болн багшнрт ик оньг тусхаҗ, эднә седвәриг болн шунлтыг дөңнҗәхнь сурһуль-эрдмин халх делгрүллһнд туслҗана. Давсн җилд Хальмг Таңһчд Әрәсән Залврин шиидвриг дөңнҗ баһ наста багшнрт сар болһн немр 5 миңһн арслң өгдг болв. Тер мет классин һардачнрт 4 миңһн арслң немв, селән һазрт көдлхәр ирсн баахн багшнрт өгдг урмдуллһна мөңгиг хойр холванд икдүлв. Таңһчин Залврин зәңглсәр, 2021-ч җилд багшнрин җалв 2018-ч җиллә дүңцүлхлә, дундлад 26 процентд өсәд, 30552 арслң тогтав. Таңһчд «Земск багш» гидг көтлвр күцәмҗтәһәр үүлдҗәнә, селән һазрт көдлҗәдг багшнр шаңһас дем авчана.

Сурһуль-эрдмин халхд олн җилдән үнн- чик седклтәһәр көдләд, дорас өсч йовх бичкдүдт гүн медрл болн чик сурһмҗ өгчәх улсиг бас дөңнхнь темдгтә. Насн-җирһлән багшин эрдмд нерәдсн улс баһчудла дамшлтарн хувалцҗ, эднд нүдн-амн болхмн. Мана таңһчд күндтә, кергән сәәнәр меддг, ачта олн багшнр бәәнә.
Багшнрин эрдмин чинр өөдлүлхин төлә сурһуль-эрдмин бүрдәцст сән таал тогталһна, ясврин көдлмш келһнә болн материальн-техническ ул батруллһна төрмүд бас хаһлгдҗахинь заах кергтә. Тиигәд, 2022-2023-ч җилмүдт сурһуль-эрдмин систем ясруллһна федеральн төсвин медлд мана таңһчд ут тоодан 35 дунд сурһульд ясврин көдлмш кегдхмн. Эн җил 17 сурһульд ясврин көдлмш кегдҗәнә, эн кергт 1,6 җува арслң олзлгдхмн. Ирх җилд болхла дәкәд 18 дунд сурһульд ясвр кехмн гиҗ зуралгдҗана, терүнд 1,5 җува арслң йилһгдхмн. Әрәсән Президентин даалһврар 2024-ч җил күртл мана орн-нутгт 1300 шин сурһуль тосхгдхмн.

Эн өдрмүдт дунд сурһулян төгсәсн баһчуд тааста эрдм шүүҗ авч ик сурһульд орхар белдҗәнә. Әрәсән Президент багшин чинр өөдлүлҗ, баахн наста багшнриг урмдуллһна төрт ик оньг өгчәхнь темдгтә.


ДООҖАН Наталья

Видео