Гемиг урдаснь илдкхин төлә

Сегодня, 15:13 | Общество, Таңһчин зәңгс, Зіњг

Шидр «Калмыкия» гидг зәңгллһнә бүрдәцд болсн харһлтд эрүл-мендин бәәдлән шинҗллһнә керг-үүлдврмүдин төр босхгдв. «Сулда» Төвин һардач Кусьминә Светлана, балһсна поликлиникин ах эмчин үүл дааҗадг Китан Ольга, гүлгн гемәс хөрлһнә таңһчин эмнлһнә ах эмч Мутла Земфира болн нилхд төрлһнә төвин ах эмч Бадмин Җирһл харһлтд орлцад, олн зүсн гемәс саглуллһна керг-үүлдврт орлцҗ, цаглань ямр нег гем илдкҗ эмнлһ экллһнә тускар тодрхаһар келҗ өгв.
Кусьминә Светланан темдглсәр, мана орн-нутгт эрүл-мендин бәәдл шинҗллһнә керг-үүлдвр 2013 җиләс авн давулгдҗана. Җил ирвәс терүнә йовудт олн зүсн гем урдаснь илдкхин төлә немр шинҗллтс кегднә. Дәкәд цергә шишлң керг-үүлдврт орлцачнр, мөч-тату, баһ наста улс гүн шинҗллт кеҗ, цаглань эмчнрт бийән үзүлҗ кергтә эмнлһ авхд онц оньг өггднә. Тер мет поликлиникәс нань эмнлһнә улд бас диспансеризацд орхд таал тогтагдв гиҗ Светлана Валерьевна темдглв.
Элст балһсна поликлиникд эрүл-мендин бәәдлән шинҗллһнә керг-үүлдврмүд ямр кевәр давулгддгин тускар Китан Ольга цәәлһв. Эн керг-үүлдврт 18-әс авн 39 нас күрсн улс һурвн җилд нег дәкҗ, 40 наснас ах улс болхла җил болһн орлцхиг эн заав. Кемр түрүн шинҗллтин йовудт ямр нег гем илдкгдсн болхла, УЗИ, КТ болн нань чигн немр шинҗллт керглгднә. Балһсна поликлиникин седвәрәр эн өдрмүдт «Элст» гиичлүрин өөр эрүл-мендин бәәдл шинҗллһнә керг бүрдәгдв. Әмтн олн зүсн шинҗллт кеһәд, дор ормднь гриппәс саглуллһна тәрлһ авч чадв. Тер мет энд флюоромобильд шинҗллт кеҗ болхмн билә. Балһсна әмтн эн кергт шунмһаһар орлцв гиҗ келх кергтә. Ольга Сергеевнан келсәр, эрүл-мендин бәәдлән шинҗлх саната улс дәәнә ветеранмудын госпиталин Герт ода бәәршлҗәдг балһсна поликлиникәс нань 1-ч болн 6-ч микрорайодт үүлддг әңгүдт бембә өдрлә 8 часас авн 17 час күртл ирәд, эмчд бийән үзүлҗ чадҗана. Эн диг-даран хамгин түрүнд көдлдг улсин төлә бүрдәгдв. Дәкәд поликлиникин эмчнрин баг көдлмшч ормсар һарч йовад, диспансеризац давулна.
Гүлгн гемиг эртәр илдкҗ цаглань эмнлһ авхд эрүл-мендин бәәдл шинҗллһнә керг-үүлдвр туслдгин тускар Мутла Земфира келәд, диспансеризацин йовудт олн зүсн шинҗллт кегддгин тускар зәңглв. Күүкд улсин болн баһчудын эрүл-мендин бәәдл шинҗллһнд ик оньг өггдҗәхин тускар Бадмин Җирһл бас келв. Нилхд төрлһнә Төвд хойр җил дарандан 18-әс авн 49 нас күрсн күүкд улс өңгәр шинҗллт кеҗ, ямр нег гем илдкҗ чаддг болна.
Күн болһн эрүл-мендин бәәдлән җил болһн шинҗләд, цаглань эмнлһ кеҗ, эмчд бийән үзүләд, эрүл-менд харлһна туст дааврта болх зөвтә гиҗ харһлтд орлцачнр темдглв. Цаглань эмчд ирәд, кергтә шинҗллт кесн күн ут нас наслҗ, эрүл-менд бәәнә, тегәд диспансеризацд эрк биш орлцх кергтә гиҗ эмчнр нег һазра улст дуудвр кев.
ДООҖАН Наталья

Видео