Дурн болн иткл – өрк-бүлин бат ул

07-07-2022, 11:44 | Общество

Күн болһна җирһлд өрк-бүлнь бат түшг болҗ, тәвсн күслдән күрхд урмд өгч, байр-зовлңгинь даахд нөкд болна. Күн болһн сурһмҗиг хамгин түрүнд өрк-бүлдән авна, тегәд дорас өсч йовх баһ үй төрскн һазр-усндан эңкр, эврәннь сойлдан болн тууҗдан дурта болхин төлә эк-эцкнь цугинь зааҗ өгх зөвтә. Әрәсән Президент Владимир Путинә зәрлгәс иштә мана орн-нутгт дәкәд нег сән өдр зарлгдв. Така сарин 8-д өрк-бүлин, дурна болн итклин Өдр шаңһа байр гиҗ темдглгддг болхмн. Өрк-бүлин чинр өөдлүлхин, бичкдүдт болн баһчудт чик сурһмҗ өгхин төлә эн өдр зарлгдҗана гиҗ орн-нутгин толһач темдглв.

Түрүн болҗ терүг 2008-ч җилд темдглсн билә, социальн-сойлын седвәрин саң терүнә бүрдәһәчнр бәәсмн. Тер җиләс авн эн сән өдриг җил болһн темдглдг болв. Мана таңһчд эн сән өдрт нерәдгдсн керг-үүлдврмүд бас болна. Хәрнь, пандемий учрад байрин керг-үүлдврмүд давулгдад уга. Болв эпидемиологическ бәәдл ясрад, хаслһна диг-даран уурулгдснас иштә олн җилдән хамдан ни-негн бәәдг, өлзәтә сән үрд өсксн өрк-бүлмүд медаляр ачлгдхмн. Тиигәд, Элстд эн җил 25 өрк-бүлд ачлвринь байрин бәәдлд бәрүлҗ өгхмн.

Хальмг улс ик кезәнәс авн өнр-өсклң болад күүкдтән чик сурһмҗ өглһнд, сойлан болн авъясан хадһллһнд ик чинр өгдг бәәсмн. Тегәд чигн арвад үр һарһҗ, өрк-бүләрн болн уңг-тохмарн бат, нег-негән дөңнҗ, кен ахан күндлҗ, бичкнән өкәрлҗ бәәдг авъяста. Эндр чигн мана таңһчд олн үртә өрк-бүлмүдин то җил ирвәс өсәд йовхнь, баахн улс һурвн болн терүнәс үлү үртә болхар зүткдгнь темдгтә. Келхд, орн-нутгин һардвр олн үртә өрк-бүлмүдиг дөңнҗ, олн зүсн керг-үүлдвр батлна, нилхд төрлһиг урмдуллһна эв-арһс күцәнә. Эндр мана таңһчд һучн һар миңһн өрк-бүләс тавн һар миңһнь олн үртә өрк-бүл болна.

Мөчн сарин эклцәр Әрәсән Президент Владимир Путин «Эк-эцкин туурмҗ» гидг орденәр ачлгдсн өрк-бүлмүдлә харһхларн олн үр һарһсн экнрт «Ачта эк» гидг өөдән ачлвриг дәкнәс бәрүлҗ өгх кергтә гисн селвг орулв. Дәкәд тиим өөдән ачлвр авсн өрк-бүлмүдиг 1 сай арслңгар мөрәлх кергтә гиҗ Президент келв. Тегәд олн үр һарһсн, чик сурһмҗ өгсн, олна бәәдл-җирһлд шунмһаһар орлцдг, седвәртә өрк-бүлмүд олнд үлгүр-үзмҗ болх зөвтәг Владимир Путин темдглв. Күн болһн хөвтә болн күцәмҗтә болхд хамгин түрүнд өрк-бүлнь, өөрхн улснь урмд өгдг. Тегәд дурн болн иткл өрк-бүл болһна ул болх зөвтә. Тер цагт мана орн-нутг батрад, өсәд-өргҗәд йовхнь маһд уга.

ДООҖАН Наталья

Видео