Хальмг теегт хамгин сәәхн кем эклҗәнә

01-04-2023, 08:02 | Общество

Җил болһн Хальмг Таңһчд хаврин хамгин сәәхн кемд «Бамб цецгин наадм» нертә ик керг-үүлдвр давулгдна. Эн кемлә олн зуульчнр мана таңһчур темцнә. Мөрн сард тег көкрәд, кевс мет улан, шар, оошк болн талдан өңгтә цецгүдәр бүркгднә.
Түрүн болҗ хальмг теегт «Бамб цецгин частр» нертә наадм 2013-ч җилд болсмн. Түрүн җилдән керг-үүлдвр Приютна районд давулгддг билә. Хөөннь наадм Целинн районд бүрдәгддг болв. Улан дегтрт ордг хальмг теегт урһҗадг зерлг бамб цецгиг хадһллһн эн чинртә керг-үүлдврин һол күслнь болна. Бамб цецгүд олар урһдг һазрин өөр таңһчин арвн һурвн района тоотла әдләр ишкә гермүд тәвгдҗ, хальмг хотн гиичнрән тосдг болв. Тер мет ишкә гермүдин өөр хальмгуд асрҗ өскдг тохма малын һәәхүл бас бүрдәдг болсмн. Мөр, темә унҗ, зуульчнр эднә деер довтлдг арһта болв. Наадмин йовудт олар ирсн гиичнр хальмг улсин тууҗла, сойлла, авг-бәрцлә өөрхнәр таньлдна. Мана келн-улсин билг- эрдм, хальмг би болн дуд, җаңһрчнрин өвәрц эрдм, хальмгуд эдлдг хот – цугнь зуульчнрин төлә өврмҗ болад бәәнә, гиҗ келх кергтә.

(полную версию статьи можно посмотреть в бумажной версии выпуска № 34 (18873) 4 апреля 2023 года, ВТОРНИК)

* * *

Хальмг Таңһчд давулгддг Бамб цецгин наадм «Әрәсән җилин хамгин сән гисн керг-үүлдврмүдин ТОП-50» тоод орсмн. Орн-нутгин сойлын министерствин болн зуульчллһна федеральн Агентствин хойр сайтд энүнә тускар келгдсинь шидр таңһчин Толһач Хаска Бату зәңглв. Эндр Хальмг Таңһчд Бамб цецгин арвдгч ончта наадм эклҗәнә.
Эн җил хаврин хамгин сәәхн байр «Җаңһр» алдр баатрльг дуулврт нерәдсн болдг. Сара хонгт таңһчин гиичнр мана йиртмҗин өвәрцлә таньлдҗ, цецгәрҗәх бамб цецгүдиг үзҗ, хальмгудын тууҗиг болн авг-бәрциг эврә нүдәрн үзҗ чадхмн. Хаврин байрин нәәрт орлцачнр ишкә гермүдәс тогтсн хотнд ирҗ, спортивн кесг марһаст, мастер-классмудт, һәәхүлмүдт, МаханФест наадмд орлцҗ, тер мет шин тосхгдсн глэмпингудт одҗ чадхмн.
Бамб цецгин наадм сара хонгт мөрн сарин 1-әс 30 күртл болхмн. Урдк җилд наадмин сарин йовудт мана таңһчд найн миңһн һар зуульч ирсн билә. Эннь зуульчнрин төлә ончта йовдл болсн деерән терүнәс нань нег һазра мана арһлачнрин төлә орута сар болснь темдглх кергтә. Мана хальмг теегт сергмҗтәһәр давулсн цагнь олн-әмтнә төлә кезә чигн мартгдшго йовдл болхнь лавта, гиҗ Хальмг Таңһчин Толһач Хаска Бату онц темдглв.

ОЛЬДАН Цаһан

Видео