Сиврин туск кґгшін тодлвр

01-04-2023, 08:20 | Общество

2023-ч җилин эклцәр Элстд бәәдг көгшә Бадмин Матрена 99 наста болв. Урднь зун наснд күрч йовх улсиг би меддго биләв, тегәд түүнлә таньлдад күүндхнь нанд соньн болҗ медгдв.

Эн Үстин района Иҗл һолын зүн көвәд бәәсн Сүмн Хурл хотнд 1924-ч җилин лу сарин 7-д һарсмн. Түүнә эк-эцкнь эгл көдлмшчнр бәәсн мөн. Эцкнь Бүрнә Манҗ урһц хуралһна багд толһачар, экнь Бүрнә Кооку саальчар көдлсн болдг. Өрк-бүлд ах-дүүһәрн дөрвн күн бәәсмн.
1931-ч җилд Матрена эклц сурһульд сурдг болв. Дән эклхин өмн эн 6-ч класст Барун хотнд сурчала. Түүнә ахнь дәәнд мордхла, эцкинь көгшн гиһәд дәәнд авсн уга. Бичкнәсн авн Матрена колхозд көдлдг болв.
Дәәнә цагт Кизләр Әәдрхн хоорнд төмр хаалһин тосхлт эклсмн. Түүнд Матрена бас орлцад хойр җилин туршт көдлмшән дууссн болдг. Көдлмш йир күнд бәәсмн, хальмгуд хаалһин ик зууһинь тосхҗ күцәсмн. Ташр төмр хаалһ нурһлҗдан күүнә һарар тосхгдла. Улан залатнр киитнд көрсн һазриг күрзәр, сүкәр цокад, цар, мөрн, темән тергәр, суулһар чигн һазр зөөһәд төмр хаалһ тосхсмн. Эн хаалһ Сталинградын дәәлдәнд немшнрин цергиг дииләд күүчснд ик тәвцән орулснь лавта.
Түүнә хөөн хальмгудыг Сиврүр туув. Тер өдр Матренан эцк көдлмшин халхар Әәдрхнд одсмн, тегәд өрк-бүлтәһән салснь тер. Тиигхд теднә өрк-бүлд Матренас нань Санчр дү көвүн болн Харун Маша хойр дү күүкн билә.

(полную версию статьи можно посмотреть в бумажной версии выпуска № 34 (18873) 4 апреля 2023 года, ВТОРНИК)

ШААКУН Василий
Түүрвәчин цоксн зург

Видео