Күндтә багшин нерн зүүлһгдв

01-04-2023, 08:24 | Общество

Шидр Целинн района Троицкое селәнд Хальмг Таңһчин сойлын ачта көдләч Ирина Самсонован санлд нерәдсн концерт болв. Энүнә нернь мана таңһчд бәәтхә, цуг орн-нутгт, нам нарт-делкәд чигн тархагдсн болдг. Санлын керг-үүлдврт орлцхар таңһчин сойлын коллективсин һардачнр, хамдан көдлҗ йовсн улс болн Ирина Григорьевнан сурһульчнр ирв.

Ирина Самсонова Татарстанд өсчбосҗ, Харьков балһсна бииһин училищд сурч, хөөннь Краснодар балһсна сойлын ик сурһуль төгсәһәд Хальмг Таңһчд ирв. Тер цагас авн бәәдл-җирһлнь хальмг тееглә батар залһлдата болв. Энд эңкр авальтаһан таньлдҗ, өрк-бүлән өндәлһҗ, үрдән өскв. 1987-ч җилд «Веселая карусель» нертә бичкдүдин бииһин ансамбль эн бүрдәсмн. Һучн тавн һар җилин туршарт Троицкое селәнә кедү көвүн-күүкн эн ансамбльд орҗ Ирина Самсонован һардврт бииһин эрдм дассн болх! Тер цагас нааран «Веселая карусель» ансамбль районд болдг байрин олн концертд даңгин орлцҗ йовдмн. Олн җилмүдин туршарт эн бичкдүдин ансамбль таңһчин, орн-нутгин болн нарт-делкән чинртә марһаст, олн зүсн наадмд орлцад ончрсн болдг. Ансамблин ханьд зун һар көвүн-күүкн орна, тедн һурвн насни багд хувагдна. Ирина Григорьевна таңһчин чинртә, ончта керг-үүлдврмүдт талдан сойлын үүлдәчнрлә хамдан бииһин режиссер болҗ шунмһаһар орлцдг билә.

(полную версию статьи можно посмотреть в бумажной версии выпуска № 34 (18873) 4 апреля 2023 года, ВТОРНИК)

ОЛЬДАН Цаһан

Видео