Район болһн эврә депутатыг суңһҗ авх

30-03-2023, 09:00 | Общество

Урҗ өдр Хальмг Таңһчин Улсин Хуралын (Парламентин) дарани сессь болв. Терүнд орн-нутгин Федерацин Советд таңһчин зака үүдәгч органа элч Алексей Майоров, ЮФО-д Әрәсән Президентин күцц зөвтә элчллтин ах федеральн инспектор Александр Беляев, таңһчин Залврин Ахлач Гилән Босхомджиева, энүнә дарукс, Парламентд Хальмг Таңһчин Толһачин элч Араш Манджиев, зөв-йос харлһна органмудын элчнр орлцв. Сүүриг таңһчин Парламентин Ахлач Анатолий Козачко һардҗ давулв. Сессьт ут тоодан хөрн төр хәләгдв, зәрм төрмүдәр депутатнр өргн күүндвр тогтаҗ, ухан-тоолврарн хувалцв.

Хальмг Таңһчин дотр-дундын кергүдин министр Сергей Никифоров, Хальмг Таңһчар Әрәсән юстицин министерствин Заллтын һардач Канибек Ураимов, таңһчд бичкдүдин зөв харсдг дааврта элч Наталья Чужаева болн күүнә зөв харслһна дааврта элч Валерий Чуб 2022-ч җилд кесн көдлмшин аш диглҗ, таңһчд әәмшг уга бәәдл тетклһнә, әмтнә зөв харслһна, шишлң цергә керг-үүлдврт орлцачнрин болн теднә өрк-бүлмүдт социальн дөң күрглһнә болн нань чигн керг-төрмүд күцәгдснә тускар тооцаһан өгв. Депутатнр эднд олн зүсн сурвр өгч, дотр-дундын кергүдин органмудт көдлх мергҗлтнриг белдлһнә, бичкдүдин амрлһна, эмнлһ авлһна, сән дурар СВО-д орлцҗадг улсин социальн харслтын төрмүд босхв.
Эн хуралтын депутатнр эн зунар үүлдврән төгсәһәд, намртан болх суңһврт белдвр эклсн бәәнә. Урдк сессьт эдн Хальмг Таңһчин Толһачин седвәрәр орулгдсн таңһчин Улсин Хуралын депутатнриг суңһлһна туск заканд сольвр орулсн билә. Тер заканас иштә намртан болх суңһврин ашт 17 депутат нег мандата округар, наадк 10 депутат партин нерн деерәс суңһгдхмн. Тегәд таңһчд 17 мандатта округ тогталһна төр босхгдв. Хальмг Таңһчин Суңһврин комиссь федеральн болн таңһчин заканла ирлцәтәһәр райодт болн Элстд нег мандатн округудын диг-дара тогталһна көдлмшиг күцәв. Таңһчин Суңһврин комиссин сегләтр Наталья Федорченко ямаран эв-арһар болн некврәр округуд бүрдәгдснә тускар депутатнрт келҗ өгв. Тиигәд, хам-хоша бәәдг селәдин муниципальн бүрдәцс талдан райодын округд орв, эннь округ болһнд нег мандатта әдл то суңһачнр орхин төлә кегдв гиҗ Суңһврин комиссин сегләтр цәәлһв. Нег округд дундлад 11 миңһн һар суңһач бәәх зөвтә. Цуг некврмүд учртан авгдсна ашт Элстд 6 округ бүрдәгдв, райодт болхла 11 мандат күртв. Эн төрәр депутатнр өргн күүндвр тогтаҗ, зәрм райод эврә депутат уга үлдх гиҗ саглулв. Зуг эннь буру тоолвр болҗахиг депутатнр Сергей Сухинин болн Очр Халгаев цәәлһәд, тиигәд шин эв-арһар болх суңһврин ашт зәрм райодын элчнрәс хойр-һурвн чигн депутат суңһгдхнь лавта болв. Наталья Дмитриевна депутатнрин соньмсулҗах сурврмудт тодрха хәрү өгснә дару эдн «Хальмг Таңһчин Улсин Хуралын (Парламентин) депутатнрин суңһвр давуллһна төлә нег мандата суңһврин округудын диг-дарана туск» гидг тогтавр батлв. Сессьт орлцсн 26 депутатас эн төсвиг 18 күн дөңнҗ дууһан өгв.
Хальмг Таңһчин Улсин Хуралын (Парламентин) Ахлач Анатолий Козачко сессьт хәләгдсн төрмүдәр ирлцңгү шиидвр батлгдв гив. Сессин сүүрт таңһчин Залврин Ахлач болн вице-премьермүд орлцҗ, босхгдсн төрмүдәр зака үүдәгч болн күцәгч йосна органмуд нөкцҗ үүлдҗәхинь темдглв. Одахн Залврин сүүрт орлцсна хөөн Әрәсән Президент Федеральн Хургт кесн илгәврт өггдсн даалһврмуд күцәлһнә төриг дарани сессьт премьер-министр депутатнрт зәңглхин тускар Анатолий Васильевич келв.
Сессин көдлмшин ашар вице-спикер Сергей Сухинин, депутатнр Михаил Мутулов болн Валерий Болдырев таңһчин олнд зәңгллһнә эв-арһсин элчнрлә харһад, хәләгдсн төрмүдәр цәәлһвр өгв. Харһлтд суңһврин округуд бүрдәлһнә төр бас босхгдв, депутатнр эврә ухан-тоолврарн хувалцв. Сергей Сухининә келсәр, нег мандатта округар болн партин нерн деерәс депутатнриг суңһҗ авлһна эв-арһ өөрхн арвн җилин эргцд олзлгдхмн. Таңһчин Суңһврин комиссь округудын диг-дара тогталһна төлә аһу ик көдлмш күцәсиг депутатнр темдглв. Эн округуд федеральн болн таңһчин закадыг эвдҗәхш, суңһврин ашар район болһн дааврта болн күндтә улсиг таңһчин Парламентин депутатд суңһҗ авхмн гиҗ эдн товчлв.

ДООҖАН Наталья
ЗУРГТ: таңһчин Улсин Хуралын (Парламентин) дарани сессь болҗах кем

Видео