Оютнр дамшлт хоршаҗана

30-03-2023, 09:00 | Общество

Эн өдрмүдт Т.Хахлынован нертә эмнлһнә колледжин оютнрин түрүн баг Санкт-Петербург балһснд «Балһсна Мариинск эмнлһн» гидг ГБУЗ-ин улд дамшлт хоршаҗана. Әрәсән Орн-нутгин Хүүвин депутат Башанкан Бадм оютнр нүүрлгч эмнлһст дамшлт хоршаҗ, мергҗлтән өөдлүлҗ авхд дөң-тусан күргнә. Урднь колледжин оютнр Москвад Склифосовскийин нертә эмнлһнд дамшлт хоршасн билә.

Оютнр цеврәр бәәлһнә, гемтә улсиг килмҗтәһәр хәләлһнә, эмнлһ авсн цагтнь дөң күрглһнә болн нань чигн халхар дамшлт хоршахмн. Эднә келсәр орн-нутгин нүүрлгч эмнлһнд дамшлт хоршаснь бәәрн эрүл-менд харлһна бүрдәцст гемтә улст дөң күргхд туслхмн. Оютнр эврәннь болн багшнриннь нерн деерәс Әрәсән Орн-нутгин Хүүвин депутат Башанкан Бадмд ханлтан өргҗ, Санкт-Петербург балһснд одад дамшлт хоршах арһ учрснд байрлҗана.
Шидр Башанкан Бадм Санкт-Петербургд одад, оютнрла харһв. «Энтн мана баһ наста мергҗлтнр. Эндр эмнлһнә, маңһдур селәнә эдл-ахун, талдан халхин оютнр бас дамшлт хоршахмн. Сәәнәр сурдг, седвәртә оютнр сән дамшлт хоршаҗ авх. Баһ цагтан гүн медрл авснь болн өөдән кемҗәтә көдлмшин чинр медснь иргчдән күцәмҗтәһәр көдлхд туслх. Мариинск эмнлһнә үүлдврлә таньлдсн мана баһчуд Хальмг Таңһчдан ирәд, дамшлтан олзлхар шунх», – гиҗ Бадм Николаевич келв.
Санкт-Петербург балһсна Мариинск эмнлһнә һардач, профессор Анатолий Завражныйд Бадм Николаевич ханлтан өргҗ, нөкцлт цааранднь чигн батрҗ делгрх гиҗ темдглв.

БАТАН Сәәхлә
ЗУРГТ: Т.Хахлынован нертә колледжин оютнр
Башанкан Бадмла болн Санкт-Петербург балһсна
Мариинск эмнлһнә һардврла

Видео