Теегин кеермҗ болҗадг бамб цецг минь...

04-04-2023, 08:10 | Общество

Мөрн сарин 1-д мана таңһчд хаврин хамгин сәәхн байр – Бамб цецгин наадм эклв. Хальмг Таңһчин Толһач Хаска Батун зәрлгәс иштә эн керг-үүлдвр урдк җиләс авн сара хонгт болна.

Элст балһсна Диилврин талвңд бемб өдрлә олн-әмтн хурв. Эн җилд Бамб цецгин наадм арвдгч кемждән давҗана. Өөнин наадм «Җаңһр» хальмг алдр баатрльг дуулврт нерәдсн болдг. Мел эн үүдәврәр дамҗад наадмин секлһнд нерәдсн концерт болв. Бемб өдрлә Бумбин орнд мет халх халун угаһар, даарх киитн угаһар теңгрин бәәдл байрлулв гиҗ келх кергтә. Байрин концертин эклцәр Делкән Цаһан Аав болн «Җаңһрин» зөргтә баатрмуд тәәз деер һарч Бумбин ориг даңгин харсчахан медүлв. Хальмг Таңһчин нертә җаңһрч Окна Цаһан Зам алдр дуулврин тасрхаг домбрт келҗ чикнә хуҗр хаңһаҗ олыг байрлулв. Тер мет таңһчин ачта артистнр Анна Очкаева, Климентий Оконов, баахн нертә дууч Дмитрий Шараев сәәхн еңсг дууһан хәләһәчнрт нерәдв. Концертд таңһчин нертә бииһин болн дууна коллективс орлцв. Тедн дунд «Бамб цецг», «Тюльпанчик», «Герл», «Веснушки болн нань чигн ансамбльмуд мөн.
Җил ирвәс мана таңһчин сойлын болн йиртмҗин өвәрцәр зуульчнр соньмсад, олар ирдг болв. Урдк җилин Бамб цецгин наадмд найн миңһн һар гиич ирсн билә. Улан дегтрт ордг бамб цецгиг хадһллһн эн чинртә керг-үүлдврин һол күслнь болна.
(полную версию статьи можно посмотреть в бумажной версии выпуска № 34 (18873) 4 апреля 2023 года, ВТОРНИК)

КАРСАНА Евгения

Видео