Дәкәд хойр депутат эрлһән орулв

04-04-2023, 08:15 | Общество

Эн намрар Хальмг Таңһчин Улсин Хуралын (Парламентин) депутатнрин суңһвр болхмн. Эн дааврта керг-үүлдвр угтҗ «Негдсн Әрәсә» парть хөн сарин 22-с авн 28 күртл урдаснь дууһан өглһнә керг бүрдәҗәнә. Партин таңһчар үүлддг региональн әңгин барин цергллтин зәңглсәр, ода деерән 70 шаху күн эрлһән орулсн бәәнә.

Шидр Элст балһсна Хургин депутатнр Александр Каманджаев болн Олег Пюрбеев бас эрлһән орулв. Александр Каманджаев Элстин медәтнрин болн гемтә-шалтгта улсин гер-интернатыг һардна, мөч тату улсин олна бүрдәцин ахлач болҗ үүлднә. Александр Васильевичин келсәр, эн ЭГС-ин һурвн хуралтын депутат болҗ үүлдәд, зака үүдәгч халхар байн дамшлт хоршав. Төрскн һазр-уснаннь делгрлтин, нег һазра улсин төлә туста болҗ цааранднь көдлх арһ болн күсл бәәнә, гиҗ депутат темдглв.
Олег Пюрбеев Әрәсән бичкдүдин саңгин болн Улан кирсин региональн әңгүдин ахлач болҗ олна бәәдл-җирһлд шунмһаһар орлцна. Дәкәд эн эврә сән дурар буйнч седклин керг-үүлдврмүдт орлцна, партин седвәрәр давулгддг керг-үүлдврмүдин медлд шишлң цергә керг-үүлдврт орлцачнрт болн теднә өрк-бүлмүдт дөңгән күргнә. «Балһсна Хургин депутат болҗ әмтнә неквр күцәҗ көдләд хоршасн дамшлтан таңһчин делгрлтин төлә олзлҗ чадҗанав. Нег һазра улст би туста болхар бәәнәв», – гиҗ Олег Пюрбеев зәңглв.
Урдаснь болх дууһан өглһн хөн сарин 22-с авн 28 күртл электронн эв-арһар болхмн. Эн керг-үүлдврт Әрәсән иргн болһн орлцҗ чадҗана.

БАТАН Наталья

Видео