Залуд – зөрг чимг

04-04-2023, 08:20 | Общество

Әрәсән Президент Владимир Путинә зәрлгәс иштә Лаганя районд өсәд-боссн Сарңга Эрднь-Һәрә Суворовин медаляр ачлгдв. Моһа сарин 17-д шаңһа ачлвринь байрин бәәдл бәрүлҗ өггдв.

Сарңга Эрднь-Һәрә Ар үзгин флотын цогц-махмуд батруллһна әңгин ах офицер, цергә альпинист болна. Эн Ар үзгин флотын цергчнриг белдлһнә, уул деер давшлһна туст эв-арһинь гүүдүллһнә кергт орлцна. Ар үзгин флотын һардач, Әрәсән Федерацин Баатр адмирал А.Моисеев өөдән ачлвринь бәрүлҗ өгчәһәд, майор Сарангов Әрәсән ВС-ин цергә белдврт болн мобилизацд орсн цергчнриг өөдән кемҗәнд белдхд ик тәвцән орулсиг онц темдглв.
«Уул деер давшхд дәкәд чигн олн өөдм бәәнә, тиим кевәр мана җирһлд кех-күцәх керг болн күрх күсл бәәнә. Хаалһиг өмәрән зүтксн күн даадг», – гиҗ Эрднь-Һәрә кел- нә. Эн цергчнриг дәкәд чигн талдан уул деер давҗ һархин төлә дахулҗ йовхдан ицҗәнә.
Өндр уул деер һархин төлә зөрг, бат эрүл-менд, чаңһ цогц-махмуд болн эв кергтә, тегәд мана нег һазра көвүн чадмг кевәр даалһвран күцәҗ, цергчнриг белдлһнә кергт күцәмҗтәһәр үүлдҗ энүнәс даву ачлвр автха гиҗ бидн дурдҗанавидн. Хаалһнь цаһан болтха!

Мана зәңгч
Зургт: Суворовин медаляр ачлгдсн Сарңга Эрднь-Һәрә
Ар үзгин флотын һардач, Әрәсән Федерацин Баатр
адмирал А.Моисеевла

Видео