Гатчина балһснд наадм соньн болв

25-05-2023, 10:00 | Общество

Моһа сарин чилгчәр Ленинградын мүҗин Гатчина балһснд баһ наста багшнрин наадм болв. Терүнд кесг региона мергҗлтнр орлцв, тер тоод Целинн района Овата селәнә дунд сурһулин тууҗин багш Анастасия Подлесная мана Хальмг Таңһчиг элчлв. Гатчина балһсна сурһульмудын ул деер бәәрн багшнр ил кичәлмүд давулв, мастер-классмуд үзүлв. Наадмд орлцачнр соньн экскурьст йовҗ кезәнә орс хан бәәсн бәәшң һәәхв.

Әрәсән гегән-герлин министерствин академин элчнр лекц умшв, баһ наста багшнриг өдгә цага эв-арһсла таньлдулв. Өөдән чинртә наадмд орлцсндан Анастасия Александровна таңһчин сурһуль-эрдмин министерствд, Целинн района һардврт, таңһчин болн района профсоюзмудт ханлтан өргв. Давсн наадмин тускар бидн баахн багшла шидр күүндвидн.
- Та тер наадмин тускар яһҗ медв?
- Хальмг ик сурһульд сессин шүүврән өгчәсн кемд, нанд Овата селәнә сурһулин һардач җиңнүләд баһ наста багшнрин хургт одх арһ бәәнә гиһәд келв, би тер дарунь зөвән өгләв.
- Ямаран эрдм та дасчанат?
- Ода би Хальмг ик сурһулин магистратурт Әрәсән тууҗин салврар сурчанав. Урднь болхла энд бакалавриат төгсәләв. 2021-ч җиләс авн мана төрскн Овата селәнә дунд сурһульд багш болҗ экләд көдлүв. Нанд 6-ч класс даалһла, энд би классин һардач болн тууҗин багш болҗ көдлҗәнәв.
- Сурһульд экләд көдлснәс авн шинкән хойр җил давҗана. Тегәд эн көдлмш таасгдҗану?
- Таасгдҗана. Ленинградын мүҗд болсн наадмд би бас баһ наста багшнрин төлә туста кесг тоот медҗ авлав, дамшлтарн хувалцлав, талдан регионмудас ирсн багшнрла таньлдлав. Сурһульд шин технологий яһҗ олзлхин тускар бас дамшлт хоршалав.
- Тууҗин багшин эрдм яһҗ шүүҗ авлат?
- Тууҗ, орс кел, утх- зокъял соньмсҗ дасчалав, тегәд эн туст мини медрл сән билә, ЕГЭ-н шүүврән чигн сәәнәр өгләв.
Тернь чик шиидвр билә гиҗ санҗанав. Ода би магистратуриг төгсәҗәнәв. Цааранднь аспирантурт орх санатав. Болв ода деерән магистерин диссертац шүүҗ авад угав. Терүгәр гүн шинҗллт кеһәд, тер көдлмшиг цааранднь аспирантурт күцәҗ болҗана. Би заочн кевәр сурчанав.
- Тууҗин болн обществознаня кичәлмүд өгхд өдгә цагт амр биш, тиимий?
- Тиим, амр биш. Багш күн медрл-дамшлтан даңгин гүүдүләд бәәх зөвтә. Арвтнр тер кичәләр соньмсна, кесг сурвран өгнә, мана селәнә тууҗар, эврәннь өвкнрин бәәдл-җирһләр соньмсна, тегәд багшин көдлмш нанд ик урмдта болн туста болҗ медгднә. Өдгә цагт олн эв-арһ бәәнә, терүг бидн өргнәр олзлнавидн, ил кичәл өгнәвидн.
- Баһ наста багш болад та «Таңһчин 2023-ч җилин багш» гидг марһанд орлцвт, тер марһан танд яһҗ тодлгдв?
- Эн җилин района марһанд орлцҗ кесг даалһвр күцәләв, тер тоод ил кичәл чигн өгләв. Бас ик үүмәтә марһан болв, нанд мана сурһулин цуг багшнр дөң болҗала, теднд ханлтан өргҗәнәв, теднә дөңгәр багшин үүлдврән эклҗәдг педагогин шишлң марһанд орлцад байн дамшлт хоршалав.
- Дәкәд баһ наста багшнр тана сурһульд бәәнү угай?
- Бәәнә. Теднәс зәрмнь бас ирлцнгү марһанд орлцла, тегәд юн болхинь, яһҗ даалһвриг күцәхинь нанд келҗ өглә, теднә селвгәр түшг кеһәд, талдан орлцачнрас ард үлдсн угав. Тиим кевәр эн марһан мадниг йостаһар хамцулв. Би мана сурһулиг төгсәләв, цуг багшнриг меднәв, теднә дөң нанд ик тусан күргҗәнә. Марһан Троицкое селәнд давв, мана коллективин элчнр бас тиигәрән одад намаг дөңнв.
- Өдгә цагт таңһчин сурһулин бәәшңгүдт ясврин ик көдлмш кегдҗәнә. Тана сурһульд бас чинртә тиим керг күцәгдхий?
- Мана сурһулин бәәшң зөвәр хуучн, тегәд 2025-ч җилд бат ясвр кегдхинь бидн цугтан теңкән уга күләҗәнәвидн.
- Тана багшнрин коллективд күцәмҗ дурдҗанавидн, көдлмштн уралан йовтха!

ТҮРВӘН Һуна

Видео