Лаганяхн гиичнрән тосв

04-05-2024, 14:42 | Зіњг, Сойл

Хальмг Таңһчин Толһач Хаска Батун зәрлгәс иштә сара хонгтан давулгдҗасн бамб цецгин наадм төгсчәнә. Район болһн эврәннь соньн, өвәрц көтлврән белдҗ, олн гиичнрән тосв.
Шидр бамб цецгин байр Лаганя районд бас болв. Бамб цецгин наадмд орлцачнриг Лаганя района муниципальн бүрдәцин толһач Коган Юрий йөрәв. Тер мет Хальмг Таңһчин Толһачин һардврин дарук Тарбан Савар, таңһчин Залврин Ахлачин дарук Дмитрий Трапезников, тосхлтын, көлгнә болн хаалһин эдл-ахун министрин үүл цаг зуур дааҗадг Өлзән Юрий болн Улсин Хуралын (Парламентин) депутат Дорҗин Артур бас бүлән үгән нерәдв.
Өрүн эртәс авн Лагань балһсна «Көк теңгсин айсмуд» нертә паркд олн-әмтн хурв. Тенд «Хальмг теегин тууль» нертә наадн үзүлгдв. Тер мет Лаганя района эврә дурар үүлддг коллективс болн хам-хоша бәәдг Әәдрхнә мүҗин Лиманск района артистнр байрин концертд орлцв. Терүнәс нань таңһчин нертә баахн артистнр Баҗан Бадм, Болдра Намҗл болн Арсена Николай бас билг-эрдмәрн олыг байрлулв. Темдглхд, эн җилд түрүн болҗ «ЗаһснФест» нертә керг-үүлдвр давулгдв. Тенд заһсна зүүтә олн зүсн хот белдгдв. Эн керг-үүлдвр авъяст тохрад, җил болһн давулгдхмн, гиҗ батлгдв.
Керг-үүлдврин йовудт района социальн-экономическ халхд ик тәвцән орулсн Нәдвдә Босяд «Лаганя района күндтә иргн» гидг нерн зүүлһгдв. Тер мет олна-политическ бәәдл-җирһлд шунмһаһар орлцҗадг Елена Алешкеева Улсин Хуралын (Парламентин) Ханлтын бичгәр ачлгдв. Терүнәс нань мөрн сарин 28-д түргн дөңгин медицинск көдләчнр сән өдрән темдглсн билә. Әрәсән Хүүвин депутат, эрүл-менд харлһна Комитетин һардач Башанкан Бадм Лаганя района фельдшермүдт Ханлтын бичгүдән бас бәрүлҗ өгв. Сойлын болн спортын халхар күцәмҗ бәрсн нег һазра улс бас темдглгдв. Тедн дунд дамшач Салыка Дольган, баһ наста бөк Манҗин Айс заагдв. Манҗин Айс болхла одахн Әрәсән марһанд ончрв, энүнд телеүзл белглв.
Байрин керг-үүлдврт ирсн улс олн зүсн мастер-класст орлцв. Терүнәс нань көглҗрһнә, һартан өөтә улс кеҗ һарһсн кегдлмүдин һәәхүл бас бүрдәгдв. Тогтсн авъясар шимтә, әмтәхн хотар әмтн тоогдв. Асхар «Көк теңгсин айсмуд» нертә паркд нәр-наадн бүрдәгдв, тенд олн баһчуд орлцад, цаган сергмҗтәһәр давулв.
КАРСАНА Евгения

Видео