«Олна баатрмуд»

07-05-2024, 14:59 | Зіњг, Сойл

Диилврин өдриг угтад, «Жаңһр» Хальмг Таңһчин наадһасин театр шин наад белдҗәнә. Төрскән харслһнд ончрсн хальмг баатрмудын санлыг тевчәд, театрин коллектив үүдәгч үүлдврән шунмһадулҗана.
Тууҗин цагиг сергәһәд, эндрк өдрин нәрн бәәдлд төрскән харслһн нег үлү ик чинр зүүҗәдг цагт театрин ах режиссер Алексей Сарангов болн артистнр Хальмгин баатрмудын дүрмүдиг тодлулхар зүткҗәнә.
Дөрвн зун җил хооран Иҗлин көвәд ирҗ бәәршләд, Әрәсән ханьд эврә сән дурар орсн цагас авн орн-нутгин өмн үзгин меҗәд хальмг церг ицлтә харул болҗ зогссмн. Тууҗин йовудт Әрәсән 20 һар дәәлдәнд хальмг церг зөргтә кевәр орлцҗ йовсмн.
Аюка хаана дәәчнр, тууль-түүкд нерднь орсн олн баатрмуд, «Җаңһрин» баатрмуд, Төрскән харсгч дәәнд ончрсн хальмг дәәчнрин туск наадн соньн болхмн. Өдгә цагт Әрәсән Баатрин нер зүүсн хальмг зөргтә үрдиннь нутгтан цергллһнә үлгүриг үзүлх наадыг Диилврин өдрт, хөн сарин 9-д, әмтн хәләҗ чадхмн.
Хальмг Таңһчин билг-эрдмин ачта үүлдәч Алексей Саранговин келсәр, Төрскән харслһн йириндән цуг мадна әрүн керг мөн. Орн-нутгиннь хөвтә җирһлин төлә әмән эс әрвлсн баатрмудын санлд нерәдҗ наад белдҗәнәвидн. Тууль-түүкд орсн баатрмудын, Мөңк Һалын өөрк Аллейд мөңкрүлгдсн баатрмудын нердиг тодлулҗ, Делгә Эрднин, Лиҗин Мингияна баатр үүлдвриг үзүлх, өсч йовх үйнрт үлгүр болх баатрмуд мадна өөр, маднла нег җирһләр бәәсинь үзүлх седкл зүүҗ театрин коллектив үүлдҗәнә.
«Олна баатрмуд» гидг төсвән цааранднь кех санан «Җаңһр» театрт бәәнә. Театр эврә тәәз деерән эн наадыг үзүлсн деерән Баатрмудын аллейд Мөңк Һалын өөр болх митинг-концертд үзүлхмн. «Баатрмуд болн зөргтә үүлдвр. Эдн Төрскнәннь төлә дәәлдлә» гидг зургудын һәәхүл театр белдҗәнә.
«Олна баатрмуд» гидг наадна дөңгәр эндрк үйин ухан-седклд Төрскән харсачнрин баатр үүлдвр тиигҗ батлгдҗана.
ҖИРҺЛИН Кермн

Видео