«Иткл» диилвр бәрв

Шидр Аһш балһснд «Әрәсән нерд» гидг бичкдүдин болн арвтнрин үүдәлтин нарт- делкән марһан-наадмин девсң болв. Эн марһан сойлын седвәр дөңнлһнә президентск саңгин дөңгәр давулгдна, жюриг нертә дууч Анита Цой һардна.
Марһана бүрдәһәчнр Элст балһсна гемтә-шалтгта бичкдүдин гер-интернатд үүлддг «Иткл» гидг ансамблин баһчуд ямр кевәр олн келн-улсин би биилдгиг ниигмин сүлҗәнд үзәд, эднд наадмд орлцх үрвр кесмн. Тиигәд, ансамбль эн марһанд орлцад, I девсңгин лауреатнрин нер зүүһәд, мөчн сард Ростов-на-Дону балһснд болх финалд орлцх зөв авв. Марһана финалд ончрсн билгтнр Кремлевск бәәшңд болх гала-концертд орлцхмн.
«Иткл» ансамбль тавн җил хооран гер-интернатд бүрдәгдв, ода терүнә ханьд 15 күн орна. Әрәсән улсин сурһуль-эрдмин йилһән сән көдләч Нохан Василий социальн бүрдәцд бәәдг күүкд-көвүдт хореографин кичәл өгнә, эн бииһин эв-арһар эднә цогц-махмуд батрулна. Василий Церенович «Хальмг бииһин эв-арһс гемтә-шалтгта бичкдүдин реабилитацд олзллһн» гидг дөңцл барт белдәд, эрдмгтә күүкд-көвүдт иим кичәлмүд туста болдгин туст байн дамшлт хоршасн багш болна. Нидн бар җилд Нохан Василий Москва балһснд болсн «Всегда человек» гидг нарт-делкән хургт орлцсн билә. Гемтә-шалтгта бичкдүдин цогц-махмуд батруллһна туст чинртә көдлмш күцәсн деерән эднә билг-эрдм делгрүлҗәх төләднь энүг «Доктор Лиза» гидг буйнч седклин саңгин мөрәһәр ачлсмн.
- Аһш балһснд болсн марһан-наадмд хореографин номинацд 60-70 үүдәгч коллектив орлцсн билә. Мана гер-интернатын ансамбль баатрмудын би бииләд, жюрин гешүдин зүрк авлв. Жюрин гешүн, Анита Цойин «Браво» гидг студин театрин режиссер Петр Костряков мана баһчудт «Әрәсән сувсн» гидг мюзиклд орлцх үрвр кев. Марһан-наадмд орлцсна хөөн бидн Аһш балһс һәәхч, Мамаев Курганд одвидн, Иҗл һолын көвәд амрвидн. Мана күүкд-көвүдт диилвр бәрснь болн Аһш балһс одад ирснь байрта болн ончта йовдл болв. Ода бидн марһана ашлгч девсңд белдвр кеҗәнәвидн, – гиҗ Василий Церенович келнә.
Ансамбльд ордг күүкд-көвүд олн келн улсин би биилнә. Багшин келсәр, эдн хальмг, орс, цииһн, уулын улсин, хазгудын би биилнә, эднә көтлврт ут тоодан 20 һар би орна. Тегәд эдн талдан социальн бүрдәцст одҗ билг-эрдмән үзүлнә. Үлгүрнь, одахн Сарпан района Һооҗур селәнд бәәдг гер-интернатд концерт өгсн деерән, тенд бәәдг медәтнриг хальмг би биилдгиг дасхв. Баһчуд эрмдгтә болв чигн билгтә, үүдәгч кевәр үүлддг, олна кергт шунмһаһар орлцдг баһ наста улс болна. Эдн хатхмр хатхна, кевс өлгнә, модар олн зүсн кегдл кенә, спортивн марһаст орлцна. Үүдәгч кевәр үүлдҗ цаган тустаһар давулснь эднд ик урмд өгнә, эдн хоорндан ниитә болна.
- Мана ансамбль тавн җилин эргцд үүлдҗәнә. Эн җилмүдин эргцд маднд цаһан седкләсн дөңгән күргдг улс баһ биш бәәнә, тегәд мана диилвр бас эднә күцәмҗ болҗана гиҗ тоолҗанав. Элст балһснд үүлддг «Лу» нертә лавкин эзн Хаалһин Лариса маднд ке-сәәхн хувц уйхин төлә эд өңгәр йилһҗ өгнә. Келхд, нег сәәхн бүшмүд уйхин төлә баһ гиснь 3 метр эд кергтә болна. Мана гер-интернатын багш Пранцуза Светлана һартан өөтә, бәрсән кедг бер болна, эн мана күүкд-көвүдт олн зүсн хувц уйв. Дәкәд Элстин техническ лицейин, нефтин болн газин колледжин багшнр маднд бас ке-сәәхн хувц уйҗ өгснд бидн ик ханлтан өргҗәнәвидн. «Алиса» гидг һосн-башмг кедг мастерскойин урчнр маднд бииһин һос кимдәр уйв. Элст балһсна бичкдүдин билг-эрдмин 1-ч тойгта сурһулин бичкдүд буйнч секдлин концерт өгәд, 50 миңһн арслңга дем маднд өгв. Краснодар балһснд бәәдг арһлач Александр Заруцкий өрк-бүлиннь нерн деерәс хазг махла белглв. Иигәд, гемтә-шалтгта бичкдүдт сана зовдг буйнч седклтә, улс маднд демән күргҗ, мана күүкд-көвүд билг-эрдмән делгрүлҗ үүдәгч кевәр үүлдхин төлә дөң болна. Хәрнь, мана бүрдәцд сән автобус кергтә болҗана, эн төр хаһлх кергтә. Бичкдүд эрмдгтә, олн зүсн гемтә, тегәд иим марһаст одхин төлә өдгә цага сән көлгн эркн кергтә болҗана, – гиҗ Василий Церенович келнә.
«Әрәсән нерд» гидг нарт-делкән марһан-наадмин девсңд орлцад, дииләчнрин тоод орсн гемтә-шалтгта бичкдүдин гер-интернатын ансамбль эврәннь нерән өөдән бәрҗ, финалд диилвр бас бәртхә гиҗ бидн дурдҗанавидн. Эднә «Иткл» гидг сән нерн орта болҗ, хальмг улсин сойл делгрүлхд туслтха.

ДООҖАН Наталья