Таңһчин Өдриг өргмҗтәһәр темдглхәр

Шидр «Негдсн Әрәсәг» дөңнлһнә олна штабд Хальмг Таңһчин Толһач Хаска Батун һардвртаһар «төгрг ширән» сүүр давв. Улсин Хуралын (Парламентин) депутатнр, сурһуль-эрдмин, сойлын, эрүл-менд харлһна болн олна бүрдәцсин элчнр терүнд орлцв. Така сарин 5-д темдглгдх таңһчин Өдрин тускар күүндвр болв. Тер мет таңһчин социальн-экономическ делгрлтин туск төр бас хаһлгдв.

Ах үйин улсин нерн деерәс таңһчин күндтә иргн, таңһчин сойлын ачта көдләч Басңга Иван үг авч, – така сарин 5-д цуһар ончта, чинртә Өдрән темдглхмн. Дорас өсч йовх баһчуд эн сән Өдрин тууҗинь эрк биш медҗ, үйәс үйд хадһлад йовх зөвтә, – гиҗ келв.
Хальмг Таңһчин ачта улсин Хүүвин ахлач Пашнана Эрднь чинртә өдрин тускар келхләрн, 1920 җилд Чилгрт болсн хальмг улсин I чуулһна тускар олнд тодлулв. Төрскнәннь тууҗан, сойлан сәәнәр медҗ, энүгәрн омг кеҗ йовтн, гиҗ нег үлү баһчудт заавран өгв.
– Мана таңһчд седклән тәвҗ, нег кергт насн-җирһлән нерәдсн өрк-бүлмүд олн бәәнә. Тер учрас таңһчин сән Өдрлә эдниг хамднь цуглулҗ, соньн харһлт кеҗ болхмн. Терүнәс нань баһчуд таңһчин иргчиг яһҗ үзҗәхән медүлҗ, эврәннь седвәрән орулҗ, шишлң төсвсин марһа тедн дунд давулҗ болхмн, – гиҗ Б.Б.Городовиковин нертә Хальмг ик сурһулин һардач Салан Бадм седвәрән орулсн болдг.
Элстин техническ лицейин багш Пүрбән Адьян болхла, таңһчин багшнрин нерн деерәс Хаска Батуд ханлтан өргҗ, сүл цагт сурһуль-эрдмин бүрдәцс ясгдад, тедниг өдгә цагин некврлә ирлцҗәдг шишлң кергсләр теткгдҗәхинь үнлв.
Әмнәсн хаһцсн, цергә шишлң керг-үүлдврин Баатрин авальнь Эрднин Ирина таңһчин Өдриг темдглсн кемд өдгә цагт түрүн зергләнд йовдг, нег һазра мана командирмүдиг орлцулх седвәр татв. Бату Сергеевич болн харһлтд орлцачнр энүг дөңнв.
Тер мет СВО-д орлцач, «Дәәч» төрскнч седклтә баһчудыг өскдг төвин дамшач Чумуда Николай бас эврә тоолвран келв. Энүнә үгәр, төвд сурдг арвтнрин эк-эцкнр теднә көдлмшиг өөдәнәр үнлнә. Орн-нутгин Президентин зәрлгәр Өрк-бүлин җил зарлгдснас иштә така сарин 5-д «Дәәч» төвд эк-эцкнрин болн көвүд-күүкдин дунд олн зүсн марһа давулхар зуралҗахан эн медүлв.
Таңһчин эрүл-менд харлһна халхин элч Босхмҗин Миран темдглсәр, эднә көдлмш бас делгрәд йовна, шин кергсл ирҗәнә, көдләчнр болхла шишлң сурһуль сурад, дамшлтан даңгин өөдлүлнә гив. Таңһчин Өдр темдглсн кемд эмчнр көдләд, нег һазра улстан сән чинртә туслмҗ күргхин тускар эн келв. Тер мет удл уга Городовиковск балһснд шин поликлиник секгдхмн, тенд болх байрта йовдлд Хаска Бату орлцхар зуралҗахан медүлв.
Сойлын халхар ямаран седвәрән орулхин тускар Манҗин Аркадин нертә Хальмг филармоня һардач Очкан Анна келҗ өгв. Урднь хам-хоша регионмудт бәәдг сойлын коллективс мана таңһчд ирәд, арвн өдрин туршарт билг-эрдмәрн байрлулдг бәәсмн. Хөөннь мана артистнр бас тедн тал йовҗ, концертс үзүлдг билә. Эн дамшлтыг шинәс сергәх седвәрән эн орулв.
Цевгә Төлән нертә хорин художественн һардач Ольга Сердюкова ончта өдрин өмн өргнд таңһчин Толһач Хаска Батун болн нег һазра улсин орлцлһтаһар Хальмгин частр дуулҗ, байрин видео цокч авхар седҗәнә.
Мана таңһчд селәнә эдл-ахун халх экономикин нег һоллгч әңгнь болдг. Селәнә эдл-ахун бәәтхә, селәнә эдл-ахун-индустриальн регион болхар зүткҗ йовнавидн. Энүнәс иштә Улсин Хуралын (Парламентин) депутат, Хар Һазра района «Первомайский» ПЗ-н СПК-н һардач Болдра Валерий таңһчин Өдриг темдгллһнә йовудт селәнә эдл-ахун һәәхүл бүрдәх седвәр орулв. Така сард хальмг теегт һаң халун болдгинь цуһар меднә, тегәд һәәхүлиг невчк эртәснь, сән Өдр угтад кехлә, йир сән болхмн, гиҗ Валерий Астаевич тоолврарн хувалцв.
Харһлтд орлцсн күн болһниг оньган өгч соңсад, Хаска Бату олн зүсн соньн седвәриг учртан авч, таңһчин Өдриг темдгллһнә туст шиидвр һарһхмн.
«Төгрг ширән» сүүрин чилгчәр Болдра Валерий таңһчин Толһач Хаска Бату намртан болх суңһврт орлцх угаһинь медхәр сурвр өгв.
– Иргчдән төрскн һазртан көдлхәр зуралҗанав. Эклсн кергүдән эрк биш төгсәх кергтә. Мана таңһчд ик чинртә төсвс сән йовудтаһар күцәгдҗәнә. Намаг нег һазра улс дөңнхлә, эннь нанд урмд өгнә. Удл уга Әрәсән Президент Владимир Путинлә харһсна дару суңһврт орлцх шиидврән олнд медүлх арһ учрхмн, – гиҗ Бату Сергеевич харһлтыг ашлв.
КАРСАНА Евгения