Нег һазра улс Хаска Батуд иткҗәхән медүлв

21-05-2024, 15:49 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Давсн долан хонгин чилгчәр Хальмг Таңһчин Толһач Хаска Бату көдлмшин халхар райодар йовв. Хамгин түрүнд төрскн Лаганя райондан социальн кесг бәәр хәләҗ, нег һазра улслаһан харһҗ күүндв. Таңһчин Залврин Ахлачин дарук, социальн делгрлтин, күч-көлснә болн көдлмшәр тетклһнә министр Өлзәтин Марина, селәнә эдл-ахун министр Гаван Тимур, ЖКХ-н болн энергетикин министр Мангута Виктория, болн спортын министр Батыра Константин Бату Сергеевичлә хамдан һарч йовсинь бас темдглхмн.

Красинское селәнд сойлын Гер тосхгдхмн
Түрүләд таңһчин һардвр Лагань-Джалыково-Лиман утдан 39 дууна хаалһин бәәдлиг шинҗлҗ хәләв. Нидн «Әәмшг уга сән чинртә хаалһс» келн-улсин төсвин йовудт эн ясгдв.
– Арвн хойр дуунад үүрмг чолун хайгдв. Өөрхн иргчд эн хаалһ хату девскртә болхмн, өдгә цагт Лаганя районд олн зуульчнр ирдг болв, тегәд энд сән таал эрк биш тогтагдх, – гиҗ Хаска Бату келв.
Терүнә дару Бату Сергеевич Бембин Тимофейин нертә Җалга селәнә дунд сурһульд одв. Таңһчин Толһач ирсн кемд тенд «Зарница» цергә-спортивн наадн давулгдҗасмн. Энд Лаганя, Хар Һазра болн Үстин райодын арвтнр чидлән сөрв. Нидн эн сурһульд бат ясвр күцәгдв, иигәрән өдгә цагин кергсл, шин мебель, интернет орулгдв.
Тер мет Хаска Бату Галсаң хурлд одад, зул өргәд мөргв. Хурлын соньн тууҗиг күндтә гиичнрт Увшан Светлана тодрхаһар келҗ өгв. Мел эн хурлд 1992 җилд XIV Дала Лам ирәд, орминь әрүслснә хөөн эднә селәнд бадм цецгүд экләд урһв.
Лаганя района бәәрн улсла селәнә сойлын Герт харһлт болв. Нег һазра улс Хаска Батуд бачм төрмүдин тускар келв.
Хамгин түрүнд Красинское селәнд сойлын шин Гер тосххиг әмтн сурв. Эн сурврт хәрү өгхләрн, Бату Сергеевич тосхлтын төсвин бәрмт цаасинь белдх кергтә гиҗ келәд, дөңгән күргхән медүлв. Цааранднь таңһчин селәнә эдл-ахун министр Гаван Тимур үг авч, ирлцңгү цәәлһвр өгв. «Селән һазрт сән таал тогталһна делгрлт» гидг көтлврәр эн төриг хаһлҗ болхмн, гиҗ Тимур Сергеевич темдглв. Эрүл-менд харлһна төрәр сурвр бас өггдв. Җалга селәнд бәәдг ФАП нурҗана, тегәд ясвр керглгдҗәнә гиҗ әмтн келв.
– Мана таңһчин селәдт эрүл-менд харлһна халхар олн бүрдәцс тосхгдҗана. Эн төр күцәлһнд олн зүсн көтлврмүд бас туслна, гиҗ Хаска Бату цәәлһҗ, тәвсн сурвр бас эрк биш хаһлгдх гиҗ иткүлв. Тер мет харһлтын йовудт нег һазра улс талдан кесг төрмүдәр сурврмудан өгч чадв. Тедн дунд заһс аңнлһна, сән таал тогталһна, җалв икдүллһнә болн нань чигн сурврмудт лаганяхн тодрха цәәлһвр авч чадв.
Харһлтын чилгчәр Лаганя района ах үйин улсин нерн деерәс Инҗин Вера үг авч, Хаска Батуд ханлтан өргҗ, йөрәлән нерәдҗ, цаһан хаалһ дурдв.

Төмр хаалһин деегүр тагт кергтә
Тер өдрин бийднь Хаска Бату болн таңһчин Залврин элчнр Хар Һазра района Артезиан селәнд бас одв. Бәәрн дунд сурһульд одад, 2022 җилд күцәгдсн бат ясвриг шинҗлҗ хәләв. Өдгә цагт сурһуль-эрдмин бүрдәцд зун һар сурһульч сурна. Селән һазрт болхла, эннь баһ биш болдг. Ясгдсн бәәрнд арвтнрин төлә цуг таал тогтагдад, бичкдүд өдгә цагин некврлә ирлцҗәдг кергсл олзлад, сарул хораст медрл авчана. Тер мет дунд сурһулин багшнрин болн сурһульчнрин күцәмҗин тускар таңһчин Толһачд бас келҗ өгв. Одахн Москван ВДНХ-д давҗадг «Әрәсә» һәәхүлд Хар Һазра района делегацин ханьд Артезиана дунд сурһулин сурһульч Пүрбән Нүүдлә йовад ирв. Тер мет карате киокушинкай марһаст ончрсн Көкән Наталья «Артек» нарт-делкән бичкдүдин төвд һурв дәкҗ амрснь бахмҗ болв. Бату Сергеевич күүкдлә күүндҗ, зурган цокч, эдн мана таңһчин иргч болҗана гиҗ урмд өгв.
Артезиана дунд сурһульд района нүүрләчнрлә, бәәрн улсла харһлт болв. Энүнә йовудт харһазрахн соньмсулҗадг төрмүдәр сурврмудан бас өгв. Артезианд Б.А.Городоваевин нертә спортивн бәәшң тосхгдад көдлҗәнә, тиигәрән көвүд-күүкд олар ирнә. Хам-хоша бәәдг селәдәс арвтнр бас ирҗ дамшна. Тегәд эн учрас бәәшңгин ул деер интернат секхиг сурв. Тер мет сойлын халхар болхла, бичкдүд көгҗмин зевсгүд цокч дасхар бас седнә, зуг Артезианд ирлцңгү сурһуль уга болҗ һарв. Цуг эн сурврмудт Хаска Бату ирлцңгү цәәлһвр өгч, ахр цагин болзгт төрмүдиг хаһлхар үгән өгв. Терүнәс нань Артезиан селәнд «Әәдрхн-Кизляр» төмр хаалһ давҗ һарна. Энүнәс иштә селән хойр әңгд хувагдв. Өдр болһн бәәрн улст чигн, бичкдүдт чигн төмр хаалһ һатлад йовх кергтә болна. Әәмшг уга бәәдл тогтахин төлә төмр хаалһин деегүр тагт тосххиг әмтн сурв. Эн төриг Хаска Бату онц оньгтан авч, «Әрәсән төмр хаалһс» бүрдәцин һардврла, көлгнә болн хаалһин эдл-ахун министерствлә хаһлх болҗ келв.
Тер өдр таңһчин һардвр одахн Артезианд секгдсн Хар Һазра хәәртә үрн, Хальмгин Баатр, нертә көгҗмч Манҗин Аркадин бумблвиг хәләҗ, цецгүд тәвҗ, билгтин санлынь тевчв.
– Селән һазрт бәәдг улсин төрмүдиг учртан авч, шулун кевәр хаһлхиг зүткҗ көдлхвидн, – гиҗ Хаска Бату нег һазра улсан иткүлв.

КАРСАНА Евгения
Нег һазра улс Хаска Батуд иткҗәхән медүлв
Нег һазра улс Хаска Батуд иткҗәхән медүлв
Нег һазра улс Хаска Батуд иткҗәхән медүлв
Нег һазра улс Хаска Батуд иткҗәхән медүлв
Нег һазра улс Хаска Батуд иткҗәхән медүлв

Видео