Владимир Путин намртан болх суңһврт Хаска Батуд күцәмҗ дурдв

23-05-2024, 16:19 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр Хальмг Таңһчин Толһач Хаска Бату Москван Кремлин бәәшңд Әрәсән Президент Владимир Путинлә харһв. Бату Сергеевич таңһчиг тавн җилдән һардҗ йовна, энүнәс иштә күцәсн көдлмшин тускар тодрхаһар Владимир Путинд келҗ өгв.
Тавн җилин ашлгч көдлмшән Хаска Батун баг «Хальмг Таңһч – чидл урһадг орм» нертә шишлң соньн презентацд орулад Президентд үзүлв.
Ямр чигн регионд хамгин үнтәнь әмтн болдг. Ик медрлтә, дааврта, дамшлтта, төрскнч седклтә улс өдр болһн һазр-уснаннь делгрлтд тәвцән орулҗ йовна. Шин олн бәәрнә зургуд, тавн җилин эргцд кеҗ-күцәсн тоот олн зүсн өңгтә презентацд орв.
– Урднь Әрәсән Президент Владимир Путин Хальмг Таңһчин социальн-экономическ халхар делгрлтин шишлң көтлвр батлсн билә. Тавн җилин туршарт таңһчд кеҗ һарһгдсн эдл-уушин кемҗән 38 процентд өсв, арһлачнрин то икдв, көдлмш уга улсин то баһрв. Селәнә эдл-ахун көдләчнр күцәмҗтәһәр көдләд, АПК-н халхиг бас делгрүлҗ йовна, – гиҗ Хаска Бату темдглв.
Тер мет сурһуль-эрдмин бүрдәцс ясгдад, ирлцңгү көдлмшиг цаг-болзгтан күцәсн орн-нутгин арвн региона тоод мана таңһч орв, гиҗ Толһач келв. Терүнәс нань нурҗадг гермүдәс нег һазра улс нүүлһгдҗәснә тускар харһлтын йовудт бас келгдв.
Усар тетклһнә бачм төр, агропромпаркин тосхлт, төрскнч седклтә баһчудыг өсклһн болн талдан чинртә төрмүдин тускар Бату Сергеевич орн-нутгин Президентд цәәлһҗ келв.
Харһлтын йовудт Хаска Бату цергә шишлң керг-үүлдврт нег һазра мана улс әмән әрвллго орлцҗахин тускар онц темдглсн билә. Тер мет СВО-д түрүн өдрәснь авн орлцсн дәәнә йовдлмудын ветеран, Барс-4 багин элч Җаңган Чимдин тускар келв. Өдгә цагт Чимид Николаевич төрскнч седклтә баһчудыг өскдг «Дәәч» төвиг һардна, тер мет таңһчин Улсин Хуралын (Парламентин) депутат болн Хальмгин хазгудын одмн болна гиҗ келв.
Терүнәс нань СВО-д орлцад, әмнәсн хаһцсн Лиҗин Мингияниг тодлад, Хаска Бату энүнд орн-нутгин хамгин өөдән чинртә «Әрәсән Баатрин» нер зүүлһснд Владимир Путинд ханлтан өргв.
Әрәсән Президент мана таңһчиг бамб цецгүд урһдг ке-сәәхн регион болҗана, гиҗ бас темдглв. Хаска Батун илдклиг оньган өгч соңсч, цугинь үнлҗ, намртан болх суңһврт күцәмҗ дурдв.
2025 җилд мана таңһчд болх шар шаҗна нарт-делкән ик хургт Владимир Путиниг иртхә гисн үрвр кегдв. Чинртә харһлтын дару Хаска Бату Президентин һардврин Ахлач Антон Вайнола күүндв.
– Антон Эдуардовичлә Владимир Путин өгсн даалһвриг яһҗ күцәхин тускар күүндвидн. Мана таңһчд оньган өгснднь Антон Вайнод ханлтан өргҗәнәв, – гиҗ Бату Сергеевич ашлв.

КАРСАНА Евгения

Видео