Дмитрий Чернышенкола харһҗ күүндв

25-05-2024, 16:30 | Общество, Таңһчин зәңгс, Хальмг Тањєчин Толєачин ґдр-бўр, Зіњг


Хальмг Таңһчин Толһач Хаска Бату Әрәсән Залврин Ахлачин дарук Дмитрий Чернышенкола харһв.
Терүнә йовудт зуульчллһна халхар ирлцңгү таал тогталһна төрәр күүндвр болв.
– Орн-нутгин Президент Владимир Путин субъектст зуульчллһна халхиг ахр цагин болзгт делгрүлх кергтәг даалһсн билә. Хальмг Таңһч болхла, эн туст делгрәд йовна. Ирлцңгү төсвст шунмһаһар орлцҗана. Эн җил шаңһас зуульчллһ делгрүллһнә халхд немр мөңгн йилһгдв. Тер мет авиазалһлдан шинәс үүлдвртән орад, Хальмгт ирдг зуульчнрин то эрк биш икдхмн. 2023 җилин һаха сард Элстин аэропортд бат ясвр күцәгдәд, хаалһд йовдг улсин төлә бәәрн икдүлгдв. Хальмг Таңһчин өргн тег, Бурхн Багшин Алтн Сүм, өвәрц сойл, келн-улсин авг-бәрц олн зуульчнриг соньмсулхмн. Нааран Әрәсән бәәтхә, талдан орн-нутгас зуульчнр ирәд бәәхмн, гиҗ Дмитрий Николаевич онц темдглв.
– Эндр мана таңһч олн гиичнрин төлә соньн, өвәрц регион болна. Зуульчнр олар ирдг арвн региона тоод орвидн. Удл уга Элстин аэропорт секгдәд, самолетмуд нисәд, гиичнрин то эрк биш өсхмн гиҗ күләҗәнәвидн. Тер мет мана таңһчд сурһуль-эрдмин бүрдәцсин ясвр бас сән йовудтаһар күцәгдҗәнә. Дорас өсч йовх үйнрин төлә сән таал цааранднь тогтаҗ йовхвидн, – гиҗ Хаска Бату темдглв.
Харһлтын йовудт 120 орм багтамҗта гиичлүр тосхлһна тускар күүндвр болв. Өдгә цагт эн төсв күцәлһнә туст арһлачнрла күүндвр кегдҗәнә.
ОЛЬДАН Цаһан

Видео