Хотл балһсна Хургин ахлач сольгдв

28-05-2024, 18:37 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр Элст балһсна Хургин дарани биш сүүр болв. Терүнд Хальмг Таңһчин Толһач Хаска Бату, таңһчин Толһачин һардврин һардачин үүл дааҗадг Кирилл Попов, Элст балһсна һардврин толһач Тепшинә Шафран, депутатнр орлцв. Сүүрт зуг нег төр хәләгдв, эннь Орзан Николай Элст балһсна Хургин Ахлачин үүләс цаг-болзгасн урд һарв.
Хальмг Таңһчин Толһач Хаска Бату сүүриг нүр үгәр секәд, одахн Әрәсән Президент Владимир Путинлә болсн харһлтд хәләгдсн төрмүд хотл балһсна әмтнә җирһлин таал ясруллһнд эрк биш туслх гиҗ темдглв. Хамгин түрүнд эннь усар тетклһнә, хог-бог зөөҗ һарһлһна, олна көлгнә үүлдвриг ясруллһна, балһснд сән кец-таал тогталһна төрмүд болв. «Элст мана таңһчин хотл балһсн болна, энтн мана теегин сувсн мөн. Бидн хамдан мана балһсна әмтнә җирһл ясрулхин төлә аһу ик көдлмш күцәҗәнәвидн. Болв хаһлх нәрн төрмүд бас бәәнә, тедниг хаһлхд орн-нутгин һардвр оньган тусхаҗ, дөң-тусан күргҗәнә. Элст балһсна делгрлтин төлә Б.Б.Городовиковин нертә ик сурһулин улд шишлң төв бүрдәҗ, терүг толһалх даалһвр Салан Бадмд өгчәнәв», – гиҗ Бату Сергеевич үгдән темдглв.
Зурһадгч Хуралтын ЭГС-ин Ахлач болҗ Орзан Николай күцәмҗтәһәр үүлдҗ, Элстин делгрлтд ик тәвцән орулв гиҗ таңһчин Толһач келәд, Хальмг Таңһчин то-дигин палатын ахлачин үүлд батлх сүв-селвг орулҗахан зәңглв. Николай Павлович Хальмг Таңһчин Толһачд болн хамдан көдлсн депутатнрт ханлтан өргв.
ЭГС-ин Ахлач цаг-болзгасн урд үүләсн һарчахиг депутатнр нег дууһарн дөңнҗ, депутатнр Малыка Светлана, Анжира София, Елена Городничая, Петр Вышкварок Орзан Николайд күцәмҗ, цаһан хаалһ дурдв. Элст балһсна Хургин Ахлач цаг-болзгасн урд дааҗасн үүләсн һарчахин учрар энүнә дарук Максим Сорокин Хургин ахлачин үүлиг цаг-зуур даах зөвтә болв.
- Әрәсән Президент Владимир Путинлә болсн харһлтд хотл балһсна әмтиг үүмүлҗәдг усар болн электрокүчәр тетклһнә төрмүд хәләгдв. Бидн мана әмтнә сә хәәҗ, эднә җирһл ясрулх зөвтәвидн. Намртан болх суңһвр угтҗ, әмтнлә харһҗ, теднә сүв-селвг оньгтан авад, тедниг дигләд, өөрхн һурвн җилин эргцд күцәх керг-үүлдврмүдин зура батлх кергтә. Кех-күцәх көдлмш баһ биш, болв бидн зуг өмәрән зөрх күслтәвидн, – гиҗ Максим Александрович келв.

ДООҖАН Наталья
Хотл балһсна Хургин ахлач сольгдв
Хотл балһсна Хургин ахлач сольгдв
Хотл балһсна Хургин ахлач сольгдв
Хотл балһсна Хургин ахлач сольгдв
Хотл балһсна Хургин ахлач сольгдв

Видео