Әрәсән тосхлтын министрлә харһв

Таңһчин Толһач Хаска Бату Әрәсән тосхлтын министр Ирек Файзуллинлә харһҗ күүндв.
– Орн-нутгин Президент Владимир Путинлә болсн харһлтын дару Ирек Энваровичлә Элстин иргнмүдиг усар тетклһнә бачм төрәр күүндвидн. Тер мет усар тетклһнә объектсин ясврт мөңг йилһлһнә төрәр күүндвр бас болв. Таңһчд тосхлт делгрҗәнә, эргндк һазрт сән таал тогтагдҗана. Эн җилин эклцәс авн 29 миңһн дөрвлҗн метр гермүд эдлврт орулгдв, олн патьрта шин 12 гер тосхгдҗана. Терүнәс нань нурҗадг гермүдәс әмтн нүүлһгдҗәнә. Эн җилин эргцд «Баһчудын» микрорайонд шин гермүд, тер мет Элстд ветеранмудын госпиталь болн социальн төв тосххар зуралҗанавидн. Эргндк һазрин 15 ормд сән таал бас тогтагдхмн.
Цуг халхар маднд дөң-тусан күргҗәдг Ирек Файзуллинд ханлтан өргҗәнәв, – гиҗ Хаска Бату товчлв.

ОЛЬДАН Цаһан