Селәдт сән кец-таал тогтах күслтәһәр

30-05-2024, 17:13 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Шаред уул өврмҗ үүдәнә.
Эн көдлмшч долан хонгиг Хальмг Таңһчин Толһач Хаска Бату Ик Буурла районд эклв. Баһ Буурл селәнд ирҗ, бәәрн улсла харһв. Таңһчин Толһачла хамдан Залврин элчнр бас йовҗ, икбуурлахна сурврмудт хәрү өгв.
Хамгин түрүнд Хаска Бату Баһ Буурл селәнд седвәргч халхар мөңг һарһҗ өглһнә туст батлгдсн көтлврин йовудт 2020 җилд тосхгдсн «Бадм цецг» нертә бичкдүдин талвң шинҗлҗ хәләв. Тенд өдгә цагин некврлә ирлцҗәдг спортивн кергслмүд углҗ тәвгдҗ. Бичкдүдиг шарх-шавас гетлҗ нааддг ормиг җөөлн девскрәр бүркҗ, хаша чигн тосхгдв. Күндтә гиичнр ирсн саамд тенд бәәрн көвүд-күүкд наачала. Бату Сергеевич бичкдүдлә күүндәд, шинкн эклсн зуни амрлһнла эдниг йөрәв.
Баһ Буурла СМО-н толһач Курнан Вячеславин келсәр, бичкдүдин талвң 2020 җилд тосхгдв. Эн төсв күцәлһнд Баһ Буурлд бәәдг болн талдан регионмудт көдлҗ йовдг нег һазра улс дөң-тусан күргв, гиҗ ханлттаһар темдглв. Тер мет бичкдүдин талвңгин өөр футбол нааддг бәәрн бас бүрдәгдв. Иигәрән көвүд өдр болһн ирәд, футбол наадхдан дурта.
Дарунь Бату Сергеевич «Ламрим Чойлинг» хурлд одҗ, терүнә соньн тууҗлань таньлдв. Хурл юуһарн ончтань гихлә, тенд XIV Дала Ламин гегәнә шишлң хора бәәнә, тенд хувцнь хадһлгдҗана. Дәкн иим өвәрц хора зуг Бурхн Багшин Алтн Сүмд бәәнә, гиҗ онц темдглх кергтә. Хаска Бату хурлыг һурв дәкҗ эргәд, дотрнь орв. Тенд зул өргәд, дотран зальврв.
Диилврин парк бас бәәрн улсин орлцлһтаһар деер келгдсн көтлврәр тосхгдв. Хаска Бату санлын бумблв хәләҗ, Төрскән харсачнрин санлынь тевчҗ, цецгүд тәвв.
2021 җилд «Сойл» келн-улсин төсвин йовудт Баһ Буурл селәнә сойлын Герт бат ясвр күцәгдв. Байрин өдрмүдт нег һазра улс нааран ирҗ, бүрдәгдсн соньн керг-үүлдврмүдт орлцхдан дурта. Тенд спортивн талвң, дегтрин саң көдлнә. Сара хонг хооран дегтрин саңд баахн мергҗлт Цымбала Альма экләд көдлв. Эн иигәрән олн-әмтн олар ирхин төлә цуг таал тогтаҗана. Мана таңһчд барас һардг һарцсиг эдн бас бичүлҗ авна, баһбуурлахн нааран ирәд умшна.
Селәнә бүрдәцс хәләснә хөөн таңһчин Толһач бәәрн улсла харһад, үүмүлҗәдг сурврмудтнь хәрү өгв.
Усар тетклһнә төр мана таңһчд бачм болна. Района төвд ус зөөдг көлгн бәәһәд, әмтн гер талан ус авч ирнә. Хол селәдт болхла, тиим шишлң көлгн уга. Тегәд баһбуурлахн селән болһна төлә ус зөөдг маши хулдҗ авхла, сән болхмн, гиҗ Бату Сергеевичд келв.
– Селән болһнд эврә шиидвр һарһҗ болна. Нег үлү ус зөөдг көлг хулдҗ авлһнд лизингәр дамҗад эн төриг хаһлҗ болхмн, гиҗ Толһач селвглв.
Тер мет усна үннь өөдләд йовна, тегәд районд ус хадһлдг ик багтамҗта шишлң сав тосхх кергтә гиҗ харһлтын йовудт ирлцңгү төр бас босхгдв.
Деер келгдсн көтлвр сән йовудтаһар күцәгдҗәнә. Хаска Батун зәңглсәр, эн җил таңһчин иргнмүдәс найн һар эрлһн орҗ ирв. Энүнә тооһинь икдүлх даалһвр өггдв.
Манычск селәнә муниципальн бүрдәцин толһач Тумута Саглр зуульчллһ делгрүллһнә төрәр соньн сурвр өгв. Селәнәс 22 дуунад Шаред уул дүңгәнә, эн өндртән 222 метрт күрнә, мана таңһчд эн хамгин ик өөдм һазр болна. Маныч селәнәс Шаред уул күртл хату девскртә хаалһ керглгдҗәнә, гиҗ келгдв. Мел тенд селәнә зуульчллһиг делгрүлҗ болхмн. Сурвриг учртан авч, цааранднь энүг яһҗ хаһлхин тускар ухалхмн гиҗ Бату Сергеевич келв.
Терүнәс нань нег һазра улс Ик Буурла района сурһуль-эрдмин кесг бүрдәцст бат ясвр керглгдҗәхин туск төрәр күүндвр һарв. Тер мет ЖКХ-н, хаалһс яслһна болн талдан социальн төрмүд харһлтын йовудт бас босхгдв.
Харһлтын чилгчәр Ик Буурла СМО-син кесг толһачнр болн Ик Буурла района сойлын төвин һардач Аджадыка Нина Хальмг Таңһчин Толһачин Ханлтын бичгүдәр болн Күндллһнә һашгудар ачлгдв.

Баһчудыг спортд орлцулхин төлә.
Тер өдр Хаска Бату Приютна района Первомайский селәнд бас одв (зургт). Түрүләд «Эрүл-менд харлһн» төсвин йовудт нидн тосхгдсн олна дамшлтын эмчин бәәр орҗ хәләв. Эн бүрдәц 1200 һар кү ирлцгү дөңгәр теткнә. Тенд өдгә цагин некврлә ирлцҗәдг цуг таал тогтагдсн бәәнә.
Первомайский селәнә лицей эн җилин намрар 90 җилин өөнән темдглхәр белдҗәнә. Таңһчин Толһач лицейд бәәдг дәәнә болн күч-көлснә туурмҗин Музейиг оньган өгч хәләв. Тер мет сурһуль-эрдмин бүрдәцд Баатрмудын тавн ширә секгдсмн. Җил болһн энд Төрскән харсачнрин санлынь тевчҗ, спортивн марһас давулгдна. Лицейин гер бат ясвр керглгдҗәхинь үзәд, Хаска Бату сурһуль-эрдмин министерствд ирх җилд ясврин көтлврт орлцулх даалһвр өгв.
Селәнә лицейин өөр бәәдг Төрскән харсачнрин бумблвд Бату Сергеевич цецгүд тәвҗ, санлынь тевчв.
Приютна района нүүрләчнрлә болн бәәрн улсла таңһчин һардвр 2019 җилд тосхгдсн сойлын Герт харһв. Харһлтд нег һазра Әрәсән Федерацин Хүүвин гешүн Байир Путеев болн таңһчин Улсин Хуралын (Парламентин) Ахлач Артем Михайлов орлцв.
Харһлтын йовудт приютнахн төв селәнд спортивн бүрдәц тосххинь сурв. Сүл җилмүдт дорас өсч йовдг үйнриг спортд орлцулхин төлә олн керг-үүлдврмүд давулгдна, зуг тедниг дамшдг орм уга гиҗ келгдв. Эн төриг таңһчин тосхлтын министерствлә хамдан хаһлх болҗ Хаска Бату үгән өгв.
Тер мет малын арс эд-бод келһнә шишлң бәәрн уга гиҗ, нег медәт ирлцңгү төр босхв. Эн төр хаһлхин туст Бату Сергеевич ирлцңгү бүрдәцст бас даалһв.
Терүнәс нань мөчн сард эн района Үлдчнә хурл хөрн җилин өөнән темдглхмн. Селәнә муниципальн бүрдәцин толһач Санзыра Бадм эн ончта керг-үүлдврт Хаска Батуд ирҗ орлцх үрвр кев.
– Первомайский селәнд олн келн-улс ахнр-дүүнр мет ниитәһәр бәәнә. Ямр чигн төриг хаһлхин төлә хамдан негдҗ күцәх кергтә, тиигхлә тәвсн күслдән эрк биш күрч, дорас өсч йовх үйнртән үлгүр болҗ йовхмн. Тер мет мана таңһч шинәс аграрн-индустриальн регион болхин төлә цуг арһ-чидлән олзлх кергтә, – гиҗ Бату Сергеевич харһлтыг ашлв.
КАРСАНА Евгения
Селәдт сән кец-таал тогтах күслтәһәр
Селәдт сән кец-таал тогтах күслтәһәр
Селәдт сән кец-таал тогтах күслтәһәр
Селәдт сән кец-таал тогтах күслтәһәр
Селәдт сән кец-таал тогтах күслтәһәр

Видео