Селәдин делгрлт – бәәрн улсин күчн

01-06-2024, 16:19 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Эн долан хонгт Хальмг Таңһчин Толһач Хаска Бату ар үзгт бәәдг райодт одҗ, бәәрн улсла харһҗана. Шидр Бату Сергеевич Баһ Дөрвдә района Тундутово селәнд одад, энд тосхгдсн парк, эмнлһ, ясгдсн дунд сурһуль хәләһәд, әмтиг үүмүлҗәдг төрмүдәр соньмсв.

Хамгин түрүнд таңһчин Толһач селәнә парк хәләв. Селәнә муниципальн бүрдәцин толһач Ольга Мединцеван келсәр, парк 2022 җилд «Балһснд сән кец-таал тогталһн» гидг федеральн төсвин медлд секгдв. Урднь энд эҗго һазр бәәсмн, ода болхла олн зүсн урһа модд болн цецгүд урһҗана, бичкдүдт болн баһчудт нааддг орм бәәнә, медәтнрин төлә бас сән таал тогтагдсмн. Иргчдән энд нәр, байрин керг-үүлдврмүд давулхин төлә тәәз углҗ тәвхәр зуралгдҗана. Паркиг хәләснә хөөн таңһчин Толһач иргнмүдт болн Төрскән харсгч Алдр дәәнд орлцсн нег һазра улст нерәдгдсн санлын бумбд цецгүд тәвв. Энд дәкәд модд суулһх кергтә, тер цагт әмтн сүүдрт амрад цаган давулҗ чадхмн, гиҗ Бату Сергеевич сүв-селвг өгв.
Тундутово селәнд ода күсдундур миңһн шаху күн бәәнә, олн үртә өрк-бүлмүдин то җил ирвәс өсәд йовна. Урднь селәнә эмнлһ хуучн герт бәәршлҗәсмн. Нидн «Эрүл-менд харлһн» гидг келн-улсин төсвин медлд селәнд олн дамшлтын эмчин офис (ОВОП) тосхад, эдлврт орулсмн. Энд баахн эмч Каарун Надежда болн дунд медицинск эгчнр Виктория Полякова болн Людмила Касанова көдлҗәнә. Бату Сергеевич эмнлһнд тогтагдсн таалыг шинҗлҗ хәләхәр орҗ ирхлә, энд эмчд ирсн бәәрн улс энүг тосад, эрүл-менд харлһна көдләчнрин тускар бүлән үгән келв. Бәәрн улс эмчән буульҗ, килмҗән тусхаҗ, үнн кевәр көдлнә, цаһан седклтә гиҗ буульҗ келәд, Надежда Сергеевна Баһ Дөрвд селәнәс зәрмдән йовһар ирнә, тегәд көлгн кергтә гиҗ зовлңгарн хувалцв. Бату Сергеевич эн төр хаһлхд үгән өгв. Өдгә цага сән таалд, сарул болн цевр хораст эмч ирсн улсиг хәләнә, энд тәрлһ, физиоэмнлһ кенә гиҗ медәтнр келв. Таңһчин Толһач өдгә цага эв-арһс көдлмштән олзлдгин тускар соньмсв. Баһ Дөрвдә района эмнлһнә ах эмч Евгения Сулукован темдглсәр, баахн эмчнр шин эв-арһсиг күцәмҗтәһәр олзлна, олн зүсн көтлвр олзлҗ, гемтә улст тусан күргнә гив.
2022 җилд Тундутово селәнд бәәрн сурһульд ясвр кеснә хөөн эн өдгә цага некврлә ирлцдг болв. Дунд сурһуль урднь ямаран бәәснә болн ясврин хөөн ямр кевәр сольгдсна туск зургуд хәләһәд, Хаска Бату багшнрин болн сурһульчнрин байр хувалцҗ, эн көтлвр мана таңһчд сән йовудтаһар күцәгдҗәнә гив. Таңһчин Толһач сурһульд үүлддг тир, музей, дегтрин саң, кичәлмүдин болн хот уудг хорас хәләв. «Непоседа» гидг театральн кружокд ордг бичкдүд дигтә зуни лагерь секлһнд белдвр кеҗәсмн, Бату Сергеевич эднлә күүндәд, сергмҗтәһәр амрхиг дурдв. Бичкдүд таңһчин Толһачла хамдан зурган цокулад, эднә сурһульд иим ке-сәәхн таал тогталһна төр хаһлснд ханлтан өргв. Сурһулин музейин үүлдвриг онц темдгләд, дәәнд орлцсн нег һазра улсин санл мөңкрүллһнә кергиг өөдәнәр үнлв. Цааранднь музейин үүлдвриг делгрүлхин төлә мөрә шүүҗ авлһна марһаст орлцх кергтә гиҗ Бату Сергеевич селвглв.
Дунд сурһульд болсн харһлтд селәнә улс олар цуглрҗ, эдниг үүмүлҗәдг төрмүдәр хувалцв. Тиигәд, эднә келсәр, усар тетклһн хамгин нәрн төр болҗана. Зуни кемд әмтн сад-һарудан услдг учрар усн күртхш, ода долан хонгт нег өдр усн өггднә. Баһ Дөрвдә района толһач Җекин Баатр болн таңһчин ЖКХ-н министр Мангута Виктория эн төрәр цәәлһвр өгв. Бәәрн улс Баһ Дөрвд күртл онц эздүдин көлгәр йовхин төлә 150-200 арслң өгнә, дәкәд хәрҗ ирхин төлә мөңгән һарһна. Зәрмдән өдрт төв селәнүр хойр-һурвн дәкҗ одх кергтә болна, тегәд хаалһд дала мөңгн һарна гиҗ бәәрн улс һундрхв. Тер мет Элст болн Аһш күртл олна көлгн йовхш, Тундутово селәнәс хол биш хаалһин амнд хог-бог цуглулдг бәәр секснә хөөн эргндк һазр бузрдв, гиҗ селәнәхн келв. Дунд сурһулин медлд бичкдүдин төлә спортивн талвң уга, ода зуни амрлһна лагерь үүлдхмн, тегәд күүкд-көвүдт цогц-махмудан батрулҗ цаган тустаһар давулхин төлә таал уга гиҗ эк-эцкнр бас заав. Харһлтын йовудт нань чигн кесг төр босхгдв, таңһчин селәнә эдл-ахун министр Һаван Тимур, селәнә муниципальн бүрдәцин толһач Ольга Мединцева дор ормднь цәәлһвр өгв.
- Мана таңһчд хойр миңһн һар селән бәәнә, цугтаднь күрх санатав. Төрскн таңһчдан, орн-нутгтан туста болхин төлә мана иргнмүдин җирһлин таал ясрулхин төлә көдлх күслтәв. Әрәсән Президент, орн-нутгин залврин һардвр мадниг дөңнҗәнә, мана таңһчиг күндлҗ, әмтнә җирһлин таал ясруллһна керг-үүлдврмүд күцәлһнд тусан күргҗәнә. Болв ода чигн чинртә төрмүд бәәнә, тегәд таднд хамгин түрүнд цуглрад, тедниг дигләд, арһ-чидлән негдүләд хамцу үүлдх кергтә. Селәнә болн района һардврт бәәрн улсиг үүмүлҗәдг төрмүдиг диглҗ авх даалһвр өгчәнәв, тедниг хаһлхд таңһчин һардвр эрк биш дөңгән күргх, – гиҗ Бату Сергеевич харһлтыг товчлҗ келв.
Харһлт төгсснә дару уста нүдәрн үзлцәд, мана төрмүдәр соньмсхар ирснд бидн байрта бәәнәвидн, таниг дөңнҗ, таңһчин делгрлтин төлә кеҗәх көдлмшт күцәмҗ дурдҗанавдн», – гиҗ бәәрн улс Хаска Батуд ханлтан өргв.
ДООҖАН Наталья
Селәдин делгрлт – бәәрн улсин күчн
Селәдин делгрлт – бәәрн улсин күчн
Селәдин делгрлт – бәәрн улсин күчн

Видео