Цергә эмч болхмн

20-08-2024, 10:49 | Зіњг, Сурєуль-эрдм

Эмч болхар эн күүкн нәәмдгч класст шиидсмн. Насна дигт күрәд, дунд сурһуль төгсәһәд, Ростовск эмнлһнә ик сурһульд сурчасн кемд Айса Мартунован (зургт) цергә эмч болх седклнь улм батрв. Төрскән харсхдан даңгин белн бәәдг улсин эрүл-мендинь харлһнд церглхәр баһ наста эмч шиидв.

Ода деерән күүкн ик сурһулин зурһадгч курст сурчана. Айса Мартунова Е. Хаглышеван нертә Яшкулин олн салврта гимназиг сәәнәр төгсәсмн.
Күүкнә өрк-бүлд багшнр болн цергә эрдмтә әмтн бәәнә. Айса болхла, эмч болхар шиидсмн. Ростовск эмнлһнә ик сурһульд үүлддг цергә сурһулин төвд Айса талдан курсантнрла хамдан эрдмин туск медрл авсн деерән цергә госпитальд дамшлт авчана. Өрүнднь курсантнр багшнрин һардврт кичәлмүдт медрлиг дасна. Дарунь эдниг госпиталин әңг болһнар дамшлт автха гиҗ йовулна. Дәәлдәнд орлцад шав авсн дәәчнрт медицинск дөң күрглһнә көдлмшиг эмчнрлә хамдан эдн күцәнә. Цергә эмчнрт кергтә болх цуг тоотыг дасч авхар Айса курсантнрла хамдан цергә шишлң сурһульд орлцҗана. Ноха сарин 10-д эдн цергә андһаран өгәд, дәәлдәнд йовх дәәчнрт медицинск дөң күргхдән белн болхмн. Сурһулин җил эклтл иргчдән йоста эмчнр болх эн оютнр госпитальд көдлхмн. Дассн тоотан иигәд эдн көдлмштән олзлҗ, дамшлт авхмн.
Айса Мартунова шүүҗ авсн эрдмән тиигәд арднь орҗ дасчана. Җил болһн зуни амрлһнд һархларн күүкн Элст балһсна поликлиникд көдлдг билә. Ода эн баахн эмч госпитальд көдләд, гемтсн болн шавтсн әмтнд эмчин дөң күрглһнә цуг тоотынь оньган өгч дасчана. Иргчдән ямаран халхар эмч болҗ үүлдхән эн ода деерән шүүҗ авад уга.
Сурһуляс сул цагтан Айса олна керг-үүлдврт шунҗ орлцна. Ростовд сурчах хальмг баһчудыг хамцуллһна көдлмш эн күцәнә. Җил болһн ик сурһульд болдг келн-улсин сойлын наадмин бүрдәһәчин негнь болҗ Айса Мартунова үүлднә. Седвәртә хальмг күүкиг ик сурһулин багшнр болн оютнр сән меднә. Олна үүлдврт орлцсн деерән Айса бийнь сәәхн биилнә, дуулна, домбр цокна. Яшкулин гимназьд үүлддг «Идрис» гидг ансамбльд орлцдг бәәсн төләдән Айса тиим билгтә болҗана. Талдан һазрт сурһуль сурад, таңһчин эрдмиг олнд медүлҗ йовхднь туслсн тер ансамблин һардач О. Джеляевд Айса даңгин ханлтан өргнә. Билг-эрдмән делгрүлхднь А. Сирохан нертә Яшкулин билг-эрдмин сурһулин багш З. Валетова дөңгән күргсиг Айса бас мартхш.
Өрк-бүлнь болн өөрхн улснь күүкнә шиидвриг дөңнәд, сурһулин болн көдлмшин хаалһнь цаһан болтха гиҗ йөрәҗәнә.
ҖИРҺЛИН Кермн

Видео