Таңһчин Толһач архиепископ Юстинианиг йөрәв

Хальмг Таңһчин Толһач Хаска Бату Элстин болн Хальмгин архиепископ Юстинианиг таңһчд шаҗна халхар церглҗ йовх 10 җилин өөнлә йөрәв. Ончта эн йовдлд нерәдсн хург Казанск кафедральн чонҗин оюни-гегән-герлин төвд болв. Таңһчд бәәдг кесг шаҗна элчнр, йосна халхин һардачнр, олна бүрдәцсин элчнр эн хургт орлцв.
Улсин хоорндк ни-эвин бәәдл батллһнд, оюни-шагшавдын чик хәләц сурһмҗллһнд архиепископ Юстиниан орулсн ик тәвцинь темдгләд, Хальмг Таңһчин Толһач Хаска Бату орс шаҗна һардачд Күндллһнә һашг бәрүлҗ өгв. Архиепископин үүлдвриг өөдән үнләд, Бату Сергеевич Юстинианиг үнн седкләсн йөрәв.
Элстин болн Хальмгин епархиг Юстиниан 2014 җиләс нааран һардҗана. Тиигхд така сарин 26-д эн үүлд батлгдсн кемлә «Троеручица» гидг нертә Бурхна Экин шүтәнә өдриг орс шаҗнд шүтдг улс темдглнә. Келхәс, Юстиниана җирһлд әрүн чинртә тиим йовдлмуд учрна. Иигәд архиерейск цол зүүсн цагнь бас Бурхна Экин шүтәнлә залһлдата болсмн. Бурхнд шүтлһнә хаалһднь тиим евәлтә йовдлмуд учрҗадг архиепископин үүлдвр Хальмг һазрин делгрлтд туста болҗана, гиҗ әмтн иткҗәнә. Урднь Приднестровьед болн США-д орс шаҗна ном тархалһна халхар күцәмҗтә кевәр үүлдҗ йовсн архиепископ Юстиниан Хальмгин һазрт арвн җилдән көдлҗ йовхинь темдгләд, цуглрсн улс таңһчин оюни җирһлд архиепископин орулҗ йовх тәвцинь зөвтәһәр үнлв.

ҖИРҺЛИН Кермн