Балһсна төв уульнц ясгдҗана

07-09-2024, 13:54 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Урҗ өдр Хальмг Таңһчин Толһач Хаска Бату, «Негдсн Әрәсә» партин күцәгч Төв комитетин һардач Александр Сидякин болн Элст балһсна һардврин толһачин үүлиг дааҗадг Лиҗикә Алдр Элстин Б.Б.Городовиковин нертә уульнцд кегдҗәдг ясвриг бүрткҗ хәләв. Тодлхас, нидн «Бичкн балһсдт болн тууҗлгч селәдт сән таал тогталһн» нертә Цугәрәсән марһана ашар талдан төсвсин дунд эн объект шүүҗ авгдсн билә.
– 2016 җилд орн-нутгин балһсдт болн селәдт сән таал тогталһна төр «Негдсн Әрәсә» партин оньгт тусхагдад, тер цагас авн ирлцңгү марһас давулгддг болв, – гиҗ Александр Сидякин келв.
Элстин һардврин толһачин үүлиг дааҗадг Лиҗикә Алдрин келсәр, төсвин мөңгнә кемҗән 230 сай арслң тогтаҗана. Ирлцңгү көдлмш хойр девсңд хувагдад, түрүңкнь - бар сарин 1 күртл күцәгдх зөвтә. Тенд сандлмуд углҗ тәвгдхмн, шам орулгдхмн, хату девскртә хаалһс тосхгдхмн. Тер мет усна сурвлҗн сольгдад, усна кеерүл тосхгдхмн гив.
– Б.Б.Городовиковин нертә уульнцд һәәхмҗтә шин орм бүрдәгдхмн, эн көдлмшиг нег һазра зурач Цонхлан Тимур күцәхмн. Терүнәс нань «Цаһан», «Көгҗмин» болн «Баатрмудын» нертә һурвн тагт ясгдҗана. Ясгдсн тоотын нерд орс келәр бәәтхә тод үзгәр дахулҗ бичгдхмн. Урһа модд бас олар тенд суулһгдх болв. Темдглхд, төсв хальмг улсин «Җаңһр» алдр дуулврла ирлцүлҗ күцәгдҗәнә, – гиҗ Элстин һардврин архитектурин болн тосхлтын әңгин ахлач Хаска Сергей цәәлһҗ келв.
– Цуг көдлмшиг цаг-болзгтнь болн сән чинртәһәр күцәх кергтә. Ирх җилд мана таңһчд болх шар шаҗна нарт-делкән ик хургт олн гиичнр ирхмн, тедн бас Элстин уульнцсар йовҗ, ке-сәәхн тоотыг үзҗ һәәхҗ чадх, – гиҗ таңһчин Толһач Хаска Бату товчлв.

КАРСАНА Евгения

Видео