Эмнлһсин үүлдвр ясрулхар

Одахн Хальмг Таңһчин Толһач Хаска Бату Әрәсән эрк биш медицинск даатхлһна саңгин (ФОМС) ахлач Илья Баланинла харһв. Харһлтд таңһчин эрүл-менд харлһна халхин финансин ул батруллһна болн нөкцлт делгрүллһнә төрмүд хәләгдв.
Давсн җилд Федерацин Хүүвин Ахлач Валентина Матвиенкон дөңгәр ФОМС-ин халхар мана таңһчд эмнлһнә бүрдәцсин өр даңцалһнд 436,1 сай арслң йилһгдсмн. Эннь таңһчин эмнлһнә бүрдәцсин үүлдвриг ясрулхд ик дөң болсмн.
- 2025 җилд мана таңһчд йилһгдх мөңгнә кемҗән 679,6 сай арслңд икдхнь байрта. Тегәд өдгә цага кергсл, эм болн нань чигн кегдл хулдҗ авлһна төриг күцәмҗтәһәр хаһлхд туслхнь лавта. Тер мет эн дөң таңһчд эрүл-менд харлһна чинр өөдлүлхмн. Федерацин Хүүвд, Әрәсән эрүл-менд харлһна министерствд, эрк биш медицинск даатхлһна орн-нутгин саңд цуг халхин дөң күргҗәхднь ик ханлтан өргҗәнәв. Орн-нутгин һардврин дөңгәр Хальмгин әмтнә сән-сәәхн җирһлин таал тогталһна көдлмшиг цааранднь күцәхвидн, - гиҗ таңһчин Толһач темдглв.
ДООҖАН Наталья