Дотр-дундын кергүдин көдләчнриг йөрәв

Җил болһн үкр сарин 10-д мана орн-нутгт дотр-дундын кергүдин бүрдәцсин көдләчин Өдр темдглгднә. Таңһчин Толһач Хаска Бату әәмшг уга бәәдл тетклһнә халхд церглҗ йовх көдләчнриг сән өдрин байрлань йөрәв.
- Хальмгт диг-дара тетклһнә халхд 2 миңһн күн церглҗәнә, күн болһн залу-зөрмгин онц тууҗта, күн болһн иргнмүдин зөв харслһнд болн олна диг-дара тетклһнд тәвцән орулҗана. Дотр-дундын кергүдин бүрдәцсин көдләчнрлә хамдан бидн әәмшг уга бәәдл тетклһнә, зөв-йос эвдлһнәс саглуллһна болн баһчуд дунд көдлмш давуллһна туст хамцу көтлвр күцәҗ үүлдҗәнәвидн. Бидн хамдан олна диг-дара харлһна көдлмшиг ясруллһна, әмтн болн зөв-йос харлһна бүрдәцс хоорндк иткл батруллһна төлә өдгә цага эв-арһс болн дамшлт олзлҗанавидн. Эн өдр ветеранмудт онц ханлтын үг нерәдҗәнәв. Залу-зөрмгин, үнн авг-бәрцин болн итклтә цергллтин авъясмуд эндрк үйин полицин көдләчнрт үлгүр болна, - гиҗ Бату Сергеевич темдглв.
Эврәннь йөрәлин үгдән таңһчин Толһач дотр-дундын кергүдин бүрдәцсин көдләчнриг дөңнллһнә керг-үүлдврмүдин тускар онц келв. Тиигәд, ниднәс авн полицин әңгин дааврта көдләчнрт сар болһн 5 миңһн арслңга дем өггднә, туула сарин 1-с авн «Әрәсән МВД-н территориальн бүрдәцин полицин әңгин дааврта сән гисн көдләч» гидг номинацд мөрә батлгдв, эннь 50 миңһн арслң тогтана.
ДООҖАН Наталья