Северное селәнд суврһн босхгдв

Лаганя района Северное селәнд суврһн босхгдв. Суврһиг әрүсллһнә болн үүлдврт оруллһна йосрхлыг Дрепунг Гоманг хурлын гелңгүд күцәснь ончта йовдл болҗана.

Хальмгт Энткгәс ирәд, Элстд, Лаганьд болн Цаһан Амнд мандл тосхлһна болн шишлң мөргүлмүд кеҗәсн гелңгүд эн керг-үүлдврт орлцснь ик буйнта керг болҗана. «Олн тоота үүдн» гисн төвд келнәс орчулхла «гоманг» гидг чинртә. Северное селәнд босхгдсн суврһн мел тиим нер зүүҗәнә.
Бәәрн улс эврә мөңгәрн әрүн эн тосхлтыг күцәв. Селәнә әмтн чадсарн бийснь тосхлтд шунҗ орлцв. Кокшан Василий, Санҗ-Һәрән Сергей, Бадмхаалһин Виталий, Саккан Баатр, Очрһәрән Эренцен, Саранкан Иван, Кокшан Константин, Һәрән Николай - эднә шунлтта көдлмшиг Ханлтын бичгәр ачлв.
Селәнә әмтиг байрта эн йовдлла Лаганя района толһач Коган Юрий йөрәв. Суврһ тосхлһн цугтад амулң-менд җирһл дурдҗ, буйнта кергт цугтан орлцсн йовдл хөв-кишгт эрк биш туслх гиҗ толһач йөрәлин үгдән темдглв.
Суврһиг шаҗна йосрхл күцәҗ, үүлдврт орулсна дару цуг әмтн мөргүлд орад зальврв. Эн шаҗна үүлдвр күцәсн Сангпо Ринпочен келсәр, эн мөргүлин хөөн суврһн селәнә хамгин хәәртә орм болхмн. Дару-дарунь нааран ирҗ, зул өргҗ зальврҗатн, ном умшҗ, бәрцән бәрҗ мөргҗәтн, гиҗ ик цолта багш заавр өгв.
Ушкана Сувсн