Шаңһа төсвс күцәхәр

Хальмг Таңһчин Толһач Хаска Бату Әрәсән Залврин Ахлачин нөкд Муслим Хучиевла көдлмшин халхар харһҗ күүндв.
Энүнә йовудт таңһчин социальн-экономическ делгрлтин шишлң көтлврин, нурад унҗадг гермүдәс әмтиг нүүлһлһнә болн «Цевр усн» шаңһа төсвин тускар күүндвр болв.
– Эн җилд шаңһа төcвин дөң-тусар нурад унҗадг гермүдәс 900 шаху күн нүүҗ һархмн, йилһгдх мөңгнә кемҗән 600 сай шаху арслң тогтахмн.
Тер мет жилищн-коммунальн эдл-ахун халх шинрүллһнә төр бас босхгдв. Целинн, Лаганя, Үстин райодт болн Элстд тосхгдҗадг усна объектс шинҗлгдҗ хәләгдв. Орн-нутгин Залврт, нег үлү Муслим Магомедовичд ханлтан өргҗәнәв. Цааранднь чигн хамцу кевәр көдләд, күслдән күрхмн, – гиҗ Бату Сергеевич ашлв.
ОЛЬДАН Цаһан