Өрк-бүлин авъясмуд: үйнрин залһлдан

Экин сән өдрлә Амр-Санана нертә Келн-улсин дегтрин саңд Әрәсән күүкд улсин ниицәнә Хальмг Таңһчд үүлддг региональн әңгин седвәрәр байрин керг-үүлдвр болв. Терүнд «Өрк-бүлин авъясмуд: үйнрин залһлдан» гидг таңһчин марһанд дииләчнриг ачлв. Олна бүрдәцин гешүд ирсн гиичнрән хальмг авъясар тосад, цәәһәр, шикр-балтаһар тоов.

Әрәсән күүкд улсин олна-шаңһа ниицәнә таңһчд үүлддг әңгин ахлач Кинзән Киштәнә келсәр, эн марһан дөрвн җил дарандан давулгдҗ, бичкдүд болн бөдүн улс дунд ик тааслт олв. Терүнд «Мини өрк-бүл» болн «Өрк-бүлин авъясмуд зургудт» гидг хойр әңг бәәсмн, эн җил «Ут дун» гидг шин әңг немгдв. Харм төрхд, җил ирвәс ут ду дуулдг улсин то баһрҗана. Тегәд ирх җилд ут дууна марһа давулх санан бәәнә. Мини эцк ут ду дуулдг билә, тегәд марһаг терүнә санлд нерәдхәр зуралҗанав, гиҗ Киштән Ивановна келв. Эн җил өрк-бүлиннь авъясмудын тускар видео болн зург илгәсн улс дунд нурһлҗ сурһульчнр болн оютнр билә. Марһанд Сарпан, Көтчнрә, Ик Буурла, Приютна, Яшкулин болн Хар Һазра райодын бичкдүд шунмһаһар орлцв.
Хальмг Таңһчин сойлын болн зуульчллһна министрин дарук Саңҗрһа Герман, таңһчин социальн делгрлтин, күч-көлснә болн көдлмшәр тетклһнә министерствин әңгин һардач Эдгән Татьяна, таңһчин баһчудын керг-төрин агентствин әңгин һардач Шугран Киштә байрин керг-үүлдврт орлцачнриг йөрәв. Таңһчин олна бәәдл-җирһлд шунмһаһар орлцдг төләднь Әрәсән күүкд улсин олна ниицәнә таңһчд үүлддг әңгин ахлач Кинзән Киштә Хальмг Таңһчин Толһачин, региональн әңгин гешүд Булдан Ирина, Мошулдан Людмила болн Шаран Лейла таңһчин залврин болн Семена Любовь таңһчин Улсин Хуралын Ахлачин Ханлтын бичгүдәр ачлгдв, Герман Эрдниевич эднд ачлвринь бәрүлҗ өгв.
Дарунь эн җилд марһанд диилвр бәрсн улсин нерд заагдҗ ачлгдв. Хамгин түрүнд «Ут дун» гидг шин әңгд диилвр бәрсн улст, диплом болн белг бәрүлҗ өггдв. Энүнд 60 күрәд уга болн 60 һарсн улс салу марһлдв. Тиигәд, җир һарсн медәтнр дунд Элст балһснд бәәдг Имкенә Зинаида 1 орм эзлв. Медәт 90 җилин өөнән темдглв, тер бийнь эн заглюн, таңһчин әмтнә социальн теткврин төвин медлд үүлддг «Ретро» гидг ветеранмудын хорин дууч болна. Эн олн җилдән «Зултрһн», «Евразия» болн «Эрдм» ансамбльмудт билг-эрдмән делгрүлҗ, кесг марһаст болн байрин керг-үүлдврт орлцҗ йовсмн. Эндр Зинаида Харитоновна һурвн үрндән, йисн ач-зеедән болн зурһан җичдән нүдн-амн болна. Насн-җирһлиннь туршарт эн ду дуулҗ, серглң-дерглң йовна. Экнь Очра Ольга ут ду дуулдг бәәсмн, тегәд күүкнь экән дахад дуулдг болв. Юрий Логвинович авальтаһан хамдан олн-әмтнә ансамбльмудт орлцдг билә. Эн марһанд медәт «Шагшг шар хулсн» гидг ут ду дуулв, зе күүкнь видео цокч белдв. Түрүн болҗ зарлгдсн «Ут дун» гидг әңгд диилвр бәрснь ээҗд ик байр үүдәв, олн ачнр-зеенрнь бахмҗ кев. Җирн нас күрәд уга улс дунд Канкан Делгр нүүрлгч ормд һарв. Эн бийнь ирҗ чадсн уга, тегәд эцкнь, нертә шүлгч Канкан Эрднь, ачлвринь авад, экнрт нерәдсн шүлгән умшв.
«Мини өрк-бүл» болн «Өрк-бүлин авъясмуд зургудт» гидг хойр әңгд 7-11 наста болн 12-17 наста бичкдүд дунд салу марһан болв. Өрк-бүлиннь тускар сәәнәр медүлҗ келҗ өгсн бичкдүд дунд Муутла Иляна болн Магомедова Амин, өрк-бүлин авъясмудын тускар хувалцсн сурһульчнр дунд Барңга Байина болн Зурһадан Сарпа диилвр бәрв. 2 - 3 ормс эзлсн бичкдүдт бас диплом болн белг бәрүлв, жюрин шиидврәр урмдулгч мөрәс бас зарлгдв.
Байрин керг-үүлдврт орлцсн А.Цебековин нертә шаңһа хорин дууч Зулан Данзн, ДДТ-н багш Увшин Татьяна билг-эрдмәрн цугтаһинь байрлулв. Бичкдүд домбрин айс дахад биилснь һәәхмҗтә болв. Үр-иньглгч таалд болсн байрин харһлтын чилгчәр цуһар хамдан зурган цокулв. Ирх җилд болх марһанд бас эрк биш орлцхвидн гиҗ бичкдүд үгән өгв.

ДООҖАН Наталья
ЗУРГТ: байрин керг-үүлдврт орлцачнр