Селәнә эдл-ахун көдләчнриг ачлв

Хальмг Таңһчин залврин Герт селәнә эдл-ахун көдләчнрин сән Өдрт нерәдсн байрин хург болв. Таңһчин Толһач Хаска Бату, Улсин Хуралын (Парламентин) Ахлач Артем Михайлов, залврин Ахлач Босхмҗин Гилән, Әрәсән селәнә эдл-ахун Министерствин элч Мирослава Скрынникова, таңһчин РМО-син толһачнр, АПК-н көдләчнр болн талдан күндтә гиичнр терүнд орлцв.
Байриг таңһчин Толһач Хаска Бату секәд, цуглрсн олн-әмтиг йөрәһәд, селәнә эдл-ахун халх мана региона экономикд ик чинр зүүҗәхинь темдглв.
– Селәнә һазрт көдлҗәдг әмтн кезә чигн хамгин күндтә, тоомсрта улст тоолгддг мөн. Нег үлү малчнрин, механизатормудын, малын эмчнрин, тәрә тәрәчнрин болн селәнә эдл-ахун талдан көдләчнрин күцәҗәдг кергнь олнд туста болн чинртә болдг. Тегәд селәнә һазр мана алдр орн-нутгин улнь болҗахнь лавта, – гиҗ Бату Сергеевич келв.
Таңһчин селәнә эдл-ахун министрин үүл дааҗадг Гаван Тимур 2024 җилин йовудт нег һазра АПК-н көдләчнрин күцәмҗин тускар тодрхаһар келҗ олнд соңсхулв. Эн җил 728 миңһн тонн буудя хурагдв, тер мет тутрһин урһц ниднәклә дүңцүлхлә 57 процентд өсв. Малчнр болхла, бас му биш төл авснь заагдв. Эндр таңһчин эдл-ахуст сүл хойр җилин туршарт бордлһна 90 талвң тосхгдсинь, тер мет өрәлнь шаңһа демин мөңг олзлсинь темдглв. Тер мет эн җил мал өсклһнд шаңһас 494,3 сай арслң йилһгдв, эн демиг 1237 фермер олзлҗ чадв. Темдглхәс, өдгә цагт малчнр үвлзлһнд белдҗәнә, эн кемиг сән йовудтаһар давулхин төлә малын шүрүн хот болн буудя 105 процентд белдгдсн болв. Малын хот хамгин икәр белдснь Яшалтан района фермермүд болҗ һарв.
Әрәсән селәнә эдл-ахун Министерствин тохма мал өсклһнә Департаментин һардачин дарук Мирослава Скрынникова йөрәлин үгән келәд, мана таңһч соньн, өвәрц регион болҗахинь темдглв. Эн эврән агрономчин үрн болад, селәнә эдл-ахун көдлмш ямр күнд болҗахинь бичкнәсн авн медсән бас келв. Нертә бичәчнр болн шүлгчнр селән һазриг эврәннь үүдәврмүдтән магтҗ, иргчдән дорас өсч йовх үйнр энүг умшҗ, селәнә көдлмш ямр чинртә керг болҗахиг меддтхә гиҗ үүдәврмүдән маднд нерәдв гив.
Тогтсн авъясар байрин хургт җилин йовудт көдлмшән даавртаһар, үнн-чик седклтәһәр күцәсн бүрдәцс болн онц күч-көлсчнр Күндллһнә темдгүдәр ачлгдв.
2024 җилин ашар мал өсклһнә халхар болн селәнә эдл-ахун эдл-ууш кеҗ һарһдг Хальмгин селәнә эдл-ахун хамгин сән бүрдәцин нерн Хар Һазра района «Первомайский» СПК-д зүүлһгдв. Эдл-ахун һардач, Хальмг Таңһчин Баатр Болдра Валерийд «Нива» тамһта көлгнә түлкүр бәрүлҗ өггдв.
– Олнд туста болн кергтә мана көдлмш амр биш, өдр-сө уга көдлх кергтә, тер юңгад гихлә орн-нутгт хулд-гүүлгәнә әәмшг уга бәәдл тогталһнд тәвцән орулҗанавидн, – гиҗ Валерий Астаевич тоолврарн хувалцв.
Тер мет мал өсклһнә халхар хамгин сән гисн төсв Яшкулин района «Интеграл Плюс» бүрдәцд күцәгдҗәх болҗ һарв. Энүг баахн арһлач Наталья Федорова һардна. Келхд, Наталья Анатольевна тавн җил хооран Санкт-Петербург балһснас ирәд, эврә кергән энд экләд бүтәсмн. Өдгә цагт эдл-ахуд 16 миңһн хөн асргдҗана, 30 һар күн көдлҗәнә. Эндр олзта-орута бүрдәцин үүлдвринь өөдәнәр үнлҗ, таңһчин Толһач Хаска Бату Наталья Федороваг йөрәҗ, «Нива» тамһта көлгнә түлкүр бас бәрүлҗ өгв.
Баһ Дөрвдә района «Плодовитое» ООО урһмл урһадг таңһчин йилһән сән бүрдәцин нер зүүв. Энүнә ахлач Юрий Искам «Лада Гранта» тамһта машиһәр ачлгдв.
Терүнәс нань байрин йовудт Улсин Хуралын (Парламентин) Ахлач Артем Михайлов, залврин Ахлач Босхмҗин Гилән, федеральн ах инспектор Александр Беляев АПК-н көдләчнриг йөрәҗ, Әрәсән болн региональн чинртә олн ачлвр бәрүлв.
Байрин хургин йовудт таңһчин нертә артистнр билгән үзүлв, таңһчин селәнә эдл-ахун көдләчнрин күцәмҗин туск шишлң һәәхүл бас соньн болв.
КАРСАНА Евгения
Зургт: таңһчин Толһач Хаска Бату нүүрлгч һардачнрт үнтә белгүд бәрүлҗ өгв