Хаалһс ясгдхмн

Хальмг Таңһчин Толһач Хаска Бату ЮФО-д Әрәсән Президентин элч Владимир Устиновин орлцлһтаһар иргнмүдлә болсн харһлтд орлцв.
Хар Һазра района бәәрн күүкд күн Георгиевск-Буденновск-Улан Хол хоорндк арвн дууна хаалһин тасрхаг ясхиг сурв. Хаалһ һучн җил хооран тосхгдад, эндр күртл ясгдад уга болҗ һарв.
– Эн хаалһин тасрха 2025 җилин үкр сар күртл ясгдхмн гиҗ Владимир Устиновд үгән өгүв. Ясврин төсв белн бәәнә. Бар сард шинҗләчнрин зөв авад, тосхлһна бүрдәциг батлхвидн. Цааранднь Комсомольский поселкас Прикумский күртл ордг хаалһиг бас ясхар зуралҗанавидн. Эн керг-үүлдвр онц бүртклһнд бәәнә, көдлмшиг цаг-болзгтнь күцәхәр зүткчәнәвидн, – гиҗ Бату Сергеевич иткүлв.
ОЛЬДАН Цаһан