Төрскән харсачнрин санлынь тевчҗ

Эн өдрмүдт мана таңһчд «Төрскән харслһнд Әрәсән орн-нутгин олн-әмтнә тәвц» нертә Цугәрәсн хург давҗана. Орн-нутгас болн талын орнас олн номтнр терүнд орлцҗана.
Шидр Хальмг Таңһчд Әрәсән цергә-тууҗин ниицәнә региональн политикин Департаментин һардач Аяна Шойгу ирв.
– Эн ниицәнә үүлдвриг сәәнәр меднәв, төрскнч седклтә баһчудыг өсклһнд эн ик тәвцән орулҗ йовна. Хальмг мөрн цергә 110-ч дивизьд орлцачнрин болн Кизләр-Әәдрхн төмр хаалһин тосхлһнд орлцсн улсин санлынь тевчҗ, кесг керг-үүлдвр давуллһнд бас тусан күргнә. Тер мет Алдр Диилврин 80 җилин өөн угтад, таңһчд бәәдг кесг бумблвс ясгдхмн. Яшкулин района Хулхт поселкд бәәдг 28-ч Әәрмд нерәдсн бумблвд бат ясвр күцәгдхмн. Аяна Алексеевнад болн РВИО-н региональн әңгин һардач Күүкән Нарнд ханлтан өргҗәнәв, – гиҗ Хаска Бату товчлв.

ОЛЬДАН Цаһан