Олна кергт тәвцән орулҗ

Бар сарин 1-д «Негдсн Әрәсә» партин бүрдсн Өдр болна. Эндр парть талдан партьсин дунд онц орман эзлнә. Өдр болһн партин гешүд орн-нутгин тууҗд тәвцән орулҗана.
«Негдсн Әрәсән» гешүд болн партиг дөңнҗәдг улс энтн күч-көлсчнр, олна үүлдәчнр, багшнр, эмчнр, спортсменмүд болна. Мел эдн чинртә төсвсиг болн көтлврмүдиг күцәлһнд дөңгән күргнә. Партин көдлмшин нилчәр мана таңһчд сурһуль-эрдмин бүрдәцс ясгдҗана. Тер мет цергә шишлң керг-үүлдврт орлцачнрин өрк-бүлмүдт онц оньг өггдҗәнә.
Элст болн Лагань балһсдт партин олна дөңнлтин штабмуд күцәмҗтәһәр көдлҗәнә. Элстин штаб орн-нутгт ончрсн штабмудын тоод орна.
– Регионмудыг даңгин дөңнҗәдг «Негдсн Әрәсә» партин ахлач Дмитрий Медведевд болн Хүүвин сегләтрин үүл дааҗадг Владимир Якушевд ханлтан өргҗәнәв. Хальмг региональн әңгин сегләтр болсн төләдән үүрмүдән йөрәҗәнәв. Әрәсән болн таңһчин цецгәрлтин төлә цааранднь седклән тәвҗ көдлхвидн, – гиҗ Хаска Бату иткүлв.
ОЛЬДАН Цаһан