Кен чигн мартгдшго

Бар сарин 3-д мана орн-нутгт нерн уга салдсин Өдр болна. Хальмг Таңһчин Толһач Хаска Бату эн өдрин чинриг темдглҗ, Төрскән харсч әмән өгсн салдсмудын санл мөңкрүллһнә көдлмш күцәҗәдг хәәврин багмудын үүлдвриг өөдәнәр үнлв.
- Мана таңһчд «Калмыкия» гидг хәәврин багмудын ниицәнә үүлдврин нилчәр әмнәсн хаһцсн салдсмудын цогцс олҗ авлһна болн тедниг оршаҗ санлынь мөңкрүллһнә туст аһу ик көдлмш кегдҗәнә. Һучн тавн җилин эргцд Төрскән харсад, әмнәсн хаһцсн 5,5 миңһн салдсин цогц олҗ авгдв, теднәснь хойр зун һар күүнә нерн илдкгдв. Һанцхн эн җил мана хәәврин багмудын элчнрин орлцлһтаһар Аһшин мүҗин Россошки селәнә цергә санлын бумблвд 1200 салдсин цогц оршагдв, теднәс 16 күүнә нернь олҗ авгдв. Эн көдлмшт баһчуд орлцҗахнь темдгтә. Төрскнәннь төлә әмән өгсн салдсмудын санл үйәс үйд хадһлгдад йовхинь эннь медүлҗәнә, - гиҗ Бату Сергеевич келв.
Хальмг Таңһчин хәәврин багмудын ниицәнә гешүдт болн олна бүрдәциг һардҗадг Дмитрий Халхиновд таңһчин Толһач ханлтан өргәд, эдн күнд болн ик чинртә көдлмш күцәҗәхиг темдглв. Эднә нилчәр баатрмудын элгн-садн кесг җил давад эврәннь өөрхн улсан зөвтә кевәр оршаҗ, санлынь тевчҗ чадна гив.
- Төрскәннь төлә әмән өгсн салдсмудын керг эндр чигн мартгдҗахш. Өдгә цагт Төрскән харсгч Алдр дәәнә җилмүдт мет миңһәд мана цергчнр аавнриннь туурмҗта авъясмудыг цааранднь делгрүлҗ, эврә отг-әәмгән харсчана, - гиҗ таңһчин Толһач темдглв.
БАТАН Наталья