Сән дурар үүлддг улсиг йөрәв

Урҗ өдр Әрәсәд эврә сән дурар үүлддг улсин Өдр темдглгдв. Хальмг Таңһчин Толһач Хаска Бату талдан улст дөңгән күргхәр зүткдг седвәртә, шунлтта улсиг сән өдрин байрла йөрәһәд, эднә үүлдвр олнд туста болна гиҗ өөдәнәр үнлв.
- Җил ирвәс мана таңһчд эврә сән дурар үүлддг улсин то икдәд йовна. Эндр ут тоодан ик-бичкн 11 миңһн күн эн җисәнд орна. Эдн чинртә социальн төсвс, йиртмҗ харлһна, төрскнч сурһмҗин, сойлын болн спортын халхар керг-үүлдврмүд давулна, бичкдүд асрҗадг өрк-бүлмүдт, медәтнрт болн һанцарн бәәдг улст дөң күргнә. Эврә сән дурар үүлддг улс Әрәсән ханьд орсн шин регионмудын әмтнд, цергә шишлң керг-үүлдврт орлцачнрт болн теднә өрк-бүлмүдт дөңгән күрглһнә туст аһу ик көдлмш кеҗәнә. Эдн сән дурар үүлддг улсин җисә дөңнлһнә региональн төвин, Улсин фронтын, «Молоды душой 08» гидг сән дурар үүлддг медәтнрин ниицәнә шунмһа орлцачнр болна. Мана таңһчд цаһан седклтә, өр-өвч, седвәртә баһчуд олн бәәхнь байрта. Эн җил Басан Городовиковин амрдг бәәрнд баһчудын Гер секгдв. Шидр энд «Бидн хамдан» мөрән региональн девсңгин дииләчнриг ачлв. Эндр мана волонтермуд нарт-делкән ик хургт орлцҗана. Талдан улст дөңгән күргхәр адһдг, килмҗән тусхадг нег һазра улс бахмҗ үүдәнә, - гиҗ Бату Сергеевич эднд йөрәлин үгән нерәдв.
БАТАН Сәәхлә