Хойр орн-нутгин нөкцлтиг батрулхар

12-12-2024, 11:04 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Эн өдрмүдт Хальмг Таңһчин делегац Мьянма Республикд йосна гиичлһнд одв. Делегациг Хальмг Таңһчин Толһач Хаска Бату толһалв.
Мьянма Әрәсәлә нөкцлт батруллһна, нег үлү Азийлә залһлда батруллһна төлә керг ик чинр зүүдг болна. Зуульчллһ болн һазрин зөөр олзллһна халхс мана нөкцлтин медлд делгрүлҗәхнь күцәмҗтә болхмн. Эн зөрүллтс хамцу үүлдврин халхар туслхмн.
- Әрәсә ил болн олзта-туста хәрлцә батрулҗ үүлднә. Мана орн-нутг Мьянман седвәриг дөңнҗ, цуг халхин дөң күргхдән белн бәәнә. Хальмг Таңһчин төлә сойлын болн шаҗна халхар хамцу үүлдвр делгрүллһн, шар шаҗна ном-сурһаль даслһна туст нег-негндән тусан күрглһн мана нөкцлтин түрүн девсңгин һоллгч зөрүллтс болна. Эн төрмүдин тускар бидн Янгон региона министр зерг Соу Тейномла болсн харһлтд күүндвидн. Бидн Шведагон әрүн һазрт болн орн-нутгин тууҗин болн байн сойлын тускар медүлҗәдг Янгона келн-улсин музейд одвидн. Мана таңһчд ирх җилд болх шар шаҗна нарт-делкән III ик хургт орлцх үрвр кевүв. Эн йовдл мана залһлда батруллһнд эрк биш туслх, - гиҗ таңһчин Толһач темдглв.
Сүл җилмүдт Әрәсә болн Мьянма хоорнд хойр орн-нутгин толһачнрин нилчәр бат залһлдан батрҗана. Хальмг Таңһч болн Мьянма шар шаҗна сойлын болн сурһалин төв болна. Тегәд чигн мана таңһч хойр орн-нутгин хоорндк иньгллтин залһлдаг батруллһнд нилчән күргҗәнә. Ирх җилд Әрәсән Президент Владимир Путинә даалһврар мана таңһчд бурхн-шаҗна нарт-делкән ик хург болхмн. Мьянман Республикин премьер-министр Мин Аун Хлайн эн керг-үүлдврт орлцх санаһан медүлв.
- Бидн нег-негнәсн холд бәәдг болв чигн хоорндан өөрхн улс болнавидн, гиҗ зерг Мин Аун Хлайн мана харһлтд темдглв. Бидн хулд-гүүлгәнә, экономикин, зуульчллһна, сурһуль-эрдмин, сойлын, спортын, номин, селәнә эдл-ахун болн нань чигн талдан халхар нөкцҗ үүлдхин тускар үгцвидн. Мьянман залврин гешүдлә хөөннь болх харһлтст мана нөкцлтин болн хамцу үүлдврин керг-үүлдврмүдин тускар тодрхаһар күүндхвидн. Мадниг бүләнәр тосад, Хальмг Таңһчин тускар сәәнәр меддгән болн Әрәсән Мьянман хоорнд хәрлцәг делгрүлхдән белн бәәх ах генерал Мин Аун Хлайнд зүркни ханлтан өргҗәнәв, – гиҗ таңһчин Толһач темдглв.
Эн йосна гиичллһ бүрдәсн Әрәсән һазадын кергүдин министерствд, Мьянмад Әрәсән күцц зөвтә элч Искандер Кубарович Азимовд Хаска Бату ик ханлтан өргв. «Уралан зөрхд туслх мана хойр орн-нутгин хоорндк чинртә нөкцлт батруллһнд тәвцән орулхвидн», – гиҗ Бату Сергеевич иткүлв.
БАТАН Сәәхлә

Видео