Нөкцлт батрулх харһлт

Эн долан хонгт Хальмгин делегац Мьянма Республикд йосна гиичлһнд бәәв. Шидр Мандалай балһснд нарт-делкән шар шаҗна Ситагу Академь бүрдәсн ик багш болн олна үүлдәч Ашин Ньяниссарла харһлт болв. 2016 җилд ик багш мана таңһчур залрҗ ирсн билә, ода болхла эн Хальмгин делегациг Мьянмана һазрт байртаһар тосв.
- Мьянман ламнр Бурхн Багшин цагас авн делгрсн шар шаҗна ном-сурһалиг әрүн кевәр хадһлҗ йовна. Маднд бурхн-шаҗна цуг зөрүллтс ик чинртә болна. Бидн шар шаҗнд сүзглдг күн болһн мана таңһчд гертән бәәснлә әдл таал тогтахар зүткнәвидн. Терүнә төлә Элстд шар шаҗна парк тогтахар зуралҗанавидн, тенд олн зүсн авъясин шаҗна тосхлтс, тер тоод Тхеравада хуучн цага сурһуль босхгдх. Эн парк күн болһнд шар шаҗна ном-сурһаль дасхин болн дамшлтла таньлдхин төлә таалта орм болхмн. Ик багш Ашин Ньяниссариг хальмг һазрт тосч, шаҗна нарт-делкән III хургт орлцхднь ик байрта болхвидн. Энүнә орлцлһн цуг нарт-делкән шар шаҗнд иткдг улст ик чинр зүүҗ мана залһлда батруллһнд тәвцән орулх, - гиҗ таңһчин Толһач келв.
Хаска Бату ик багш Ашин Ньяниссарт Хальмгин делегациг бүләнәр тосснд ханлтан өргҗ, эн харһлт мана нөкцлтин болн бат залһлдана шин девсң болх гиҗ ицҗәхән медүлв.
ДАВАН Наталья