Бичкдүдиг байрлулхар

Әрәсән Президент Владимир Путин, орн-нутгин залврин ахлач Михаил Мишустин, Федерацин Хүүвин ахлач Валентина Матвиенко, орн- нутгин залврин гешүд гемтә-шалтгта, өнчрсн бичкдүдин седклин санаһинь шин җилин өмн өргнд күцәҗ, «Күслин һацур» гидг керг-үүлдврт орлцв.

Тер мет таңһчин Толһач Хаска Бату буйнч седклин керг мана хальмг теегт эклв гиҗ олнд зарлла. Җирһлин күнд-күчр таалд туссн бичкдүдт болн арвтнрт дөң болх күслтә тиим керг -үүлдвр тәвҗәнә гиҗ тодлулх кергтә. Тиим буйнч керг-үүлдвр күцәгдҗәнә дөң болх седклтә цуг әмтн орлцҗ чадҗана. Москвад болсн Орн-нутгин Хүүвин хургин сүүрин хөөн Кремлин һацур моднд мана таңһчин бичкнә илгәсн бичгинь шүүҗ авад, Бату Сергеевич түүнә санаһинь күцәхәр иткүлв.
Хальмг Таңһчас шиидгдсн сенатор Борис Хачиров бас эн туст иигҗ келв: «Шин җилин өмн өргнд илвтә йовдл эрк биш учрҗ, бичкдүдин санань күцәх зөвтә гиҗ кен-негнь санна. Әрәсән Федерацин Хүүвд бас «Күслин һацур» гидг буйнч седклин керг-үүлдвр болв, терүг Ахлач Валентина Матвиенко секв. Би бас эн керг-үүлдврт байрта-бахтаһар орлцув. Мана Хальмг Таңһчд бәәдг 14-тә Дулахан Байрта гитар хулдҗ өгхин тускар сурв. Арвтын санаһинь күцәҗ, Байртаг Шин җилин байрла йөрәҗәнәв!»- гиҗ Борис Бекмуратович келв.
Тер мет сенатор Элстин олн үртә өрк-бүлд асргдҗадг Владимирин болн Эңкрин санаһинь күцәһәд, теднд шишлң кергсл хулдҗ өгв. Борис Бекмуратович өрк-бүлднь ирхлә бичкдүд бас нег санаһан келв. Терүгинь чигн сенатор күцәхәр зуралҗана. «Бичкдүдин күсл эрк биш күцх зөвтә»,- гиҗ эн тоолҗана.
Эн өдрмүдт талдан бичкдүдин санань бас күцх, тер буйнта кергиг экономикин болн хулд-гүүлгәнә министрин үүл дааҗадг Чиҗин Андрей болн баһчудын кергүдин агентствин һардачин үүл дааһач Камиль Маркеев, сурһуль-эрдмин болн номин министрин үүл дааҗадг Әңгрә Булһн болн дааврта нань чигн кесг улс эн буйнта кергт орлцҗана.
Эн керг-үүлдврин йовудт Булһн Борисовна һацурас хойр наадһа шүүҗ авв, терүнд Хальмг Таңһчин болн Луганск Улсин Республикин күүкд күслән медүлҗ бичҗ.
«Бидн бичкдүдин күслинь тохраҗанавидн,илвтә керг күцәҗәнәвидн. Тернь маднд чигн байрта-бахта йовдл болҗана. Күнд йовдлла харһсн күүкд Шин җилин өмн өргнд зуг сарул-сәәхн тоотын тускар ухалх зөвтә. Тиим керг-үүлдврт орлцсн бөдүн улс күүкдт дөң болсн деерән цаһан седклтә кергүд күцәлһнд кесг үүрмүдән орлцулҗ, мана таңһчин әмтиг хамцулҗана»,- гиҗ министр келәд, цуг бичкдүдиг болн сурһульчнриг Шин җилин байрла йөрәв.
ТҮРВӘН һуна