Хальмг Таңһч уралан зөртхә!

Буур җил һарад, ботхн җил орҗах цагиг таңһчин әмтн байрин бәәдлд темдглв. Бурхн Багшин Алтн сүмд Зулын өдриг байрин мөргүлд орлцҗ темдглхәр цуглрҗ ирсн әмтиг Хальмг Таңһчин Шаҗн Лам Гевш Тензин Чойдак үнн седкләсн йөрәв.
Бурхн-шаҗнд шүтдг әмтнд эннь йир ик чинртә өдр болдгиг, эн өдр хальмгуд насан авад, Зуңква гегәндән зальврҗ, миңһн зул өргдг байр болдгинь ах багш зааҗ келв. Хальмг нерән өөдән бәрәд, әмтнд тусан күргәд, өвкнрин авъясмудыг мартлго бәрәд, чик седкләр бәәхлә, буйн икдх, улсин җирһл ясрх, гиҗ Шаҗн Лам иткүлв.
Байрин мөргүлд орлцсн Хальмг Таңһчин Толһач Хаска Бату Зулын байрла таңһчин әмтиг йөрәв.
Хурлд тогтсн евәлтә бәәдлиг темдгләд, Бату Сергеевич нааран ирхдән седкләрн зүткдгин тускар, Шаҗн Ламла харһҗ күүндх болһндан төрскн һазран делгрүлхд туслх тоолврарн хувалцад, шин зура үүддгинь таңһчин Толһач ончлҗ заав. Хурлд ирәд, итклән батлдган, урмд авдган күүкн көвүн хойртан келҗ өгснә тускар Бату Сергеевич келв. «Бәәдл-җирһлд юн чигн учрв чигн бийән чаңһар бәрҗ, хоорндан ниитәһәр үүлдәд, ухаһан геелго, өвкнрин үүлдврәс урмд авч, бийән батлх кергтә. Тер омгарн чидл авад, төрскн хальмг һазран улм ясрулхар цуг чидлән залхмн. Эндр бидн цергә шишлң керг-үүлдврт орлцҗадг цергчнр эрүл-менд иртхә, теднә өрк-бүлмүд, өөрхн улснь амулң-менд бәәтхә гиҗ зальврҗанавидн. Зулдан нерәдсн сәәхн эн байр Хальмг Таңһчин делгрлтин төлә зөрхд туслх болтха! Хальмг Таңһч, уралан!» – гисн үгмүдәр Хаска Бату омг өгч таңһчин әмтиг йөрәв.
Хурлд болсн байрин ик мөргүлд Хальмг Таңһчин залврин Ахлач Босхмҗин Гилән бас орлцв. Хурлд ирсн әмтн мөргүлин завсрт хальмг цә-боорцгар тоогдв.
УШКАНА Сувсн