Шин көтлвр күцәгдхмн

[b][b]Шидр Әрәсән Залврин Ахлач Михаил Мишустин эврәннь даруксла селвлцә давулв. Тенд 2025 җилин йовудт кех-күцәх төрмүдин тускар цәәлһҗ келгдв.[/b]
Эн җилд Әрәсән Президент Владимир Путинә даалһсар орн-нутгт «Агромотиватор» нертә көтлвр экләд күцәгдхмн. Темдглхд, эн көтлвр цергә шишлң керг-үүлдврт орлцачнрин төлә бүрдәгдв. Мана таңһчин төлә эн төр йир чинртә, тер юңгад гихлә өөрхн җилмүдин эргцд бидн аграрн-индустриальн регион болхар зүткҗәнәвидн. Эн туст Хальмг Таңһчин Толһач Хаска Бату эврәннь ухан-тоолврарн хувалцв.
– Давсн җилин чилгчәр болсн «Шуд залһлдана» йовудт нег һазра мана СВО-д орлцачнр цергллтин хөөн төрскн таңһчдан туста болҗ көдлхәр седклән медүлсн билә. «Агромотиватор» көтлврин күцәлһн мел эднд көдлмшин шин ормс бүрдәлһнд туслхмн. Гертән хәрү ирәд, мана баатрмуд эн көтлврт орлцад, шаңһас дем авад, эврә кергән бүрдәҗ чадҗана. Бод малын өсклһнд, махна болн үснә зүүтә хот-хол кеҗ һарһлһнд 7 сай арслң күртл дем өггдхмн. Талдан халхсар кергән бүрдәхлә 5 сай арслң күртл дем һарһҗ өггдхмн. Хальмгин селәнә эдл-ахун министерствд ирлцңгү даалһвр өггдв. Өдгә цагт болхла малын хот кеҗ һарһлһна төр хаһлгдҗана, аграрн-индустриальн регион болхин төлә көдлмш күцәгдҗәнә, гиҗ келх кергтә. Иим кевәр орн-нутгин һардвр эврәннь иргнмүдин, нег үлү Төрскән харсачнрин төлә цуг таал тогтахар зүткҗәнә, – гиҗ Хаска Бату цәәлһҗ келв.
ОЛЬДАН Цаһан