Сурһульмудын ясвриг депутатнр бүрткхмн

18-01-2025, 13:41 | Новости, Таңһчин зәңгс, Зіњг

Хальмг Таңһчин Улсин Хуралын (Парламентин) Ахлач Артем Михайлов болн депутатнр 2025 җилд таңһчин сурһуль-эрдмин бүрдәцст бат ясвр келһнә төрәр болсн сүүрт орлцв. Селвлцән таңһчин сурһуль-эрдмин болн номин министерствин седвәрәр бүрдәгдв. Чинртә төрәр болсн харһлтд Әрәсән Федерацин Хүүвин элч Хачра Борис, таңһчин сурһуль-эрдмин болн номин министрин үүл дааҗадг Әңгрә Булһн, таңһчин ах санитарн эмч Санҗин Җаңһр, таңһчин күцәгч йосна болн райодын муниципальн бүрдәцсин элчнр орлцв.
2022-2024 җилмүдин эргцд таңһчин сурһульмудт кегдсн бат ясврин ашин тускар Әңгрә Булһн зәңгләд, эн җил арвн сурһульд болн бичкдүдин хойр садт бас сән таал тогтагдхин тускар келв. Сурһуль-эрдмин бүрдәцст бат ясвр келһнә орн-нутгин көтлврин керг-үүлдврмүд күцәлһнә халхар мана таңһч нүүрлгч регионмудын тоод орҗахиг дааврта һардач темдгләд, тегәд өөрхн һурвн җилин эргцд бат ясвр кех бүрдәцсин то өсв гив.
Артем Михайловин келсәр, таңһчин Улсин Хуралын депутатнр бат ясвр кегдсн бүрдәцст дару-дарунь одҗ, тосхлтын көдлмшиг бүртксн билә. Эн туст райодын муниципальн бүрдәцслә болн Элст балһсна һардврла бат залһлда бәрҗ, ясврин көдлмш батлгдсн диг-дараһар цаг-болзгтан сән чинртәһәр күцәгдхиг эрк биш бүрткх кергтә гиҗ депутатнрт даалһвр өгв.
ДООҖАН Наталья

Видео