«Земск багш» көтлвр цаарандан күцәгдҗәнә

Хальмг Таңһчд «Земск багш» шаңһа көтлвр цаарандан күцәгдҗәнә. Әрәсән Президент Владимир Путинә седвәрәр эн көтлвр 2030 җил күртл күцәгдхмн.
Мана таңһчд эн көтлвр сән йовудтаһар күцәгдҗәнә, гиҗ келх кергтә. Өдгә цагт эн көтлврәр таңһчин селәнә дунд сурһульмудт 46 багш көдлҗәнә. Эдн цуһар нег дәкҗ йилһҗ өгдг 1 сай арслң дем авсмн.
– Эн җилд Ик Буурла, Көтчнрә, Лаганя, Приютна, Сарпан, Целинн, Яшалтан болн Яшкулин райодт керглгдҗәдг 8 мергҗлтиг «Земск багш» көтлврәр тиигәрән илгәхәр зуралҗана. Тер мет урдк җилд баахн багшнриг урмдулхин төлә таңһчин хазнас өгдг дем 400 миңһн арслңд икдв. Терүнәс нань орн-нутгин залвр селәнә дунд сурһульмудт агротехническ шишлң классмудт кичәлмүд давулдг багшнрт 30 миңһн арслң немр дем өгхмн, гиҗ шидр зәңглв. Б.Б.Городовиковин нертә Хальмг ик сурһулин дөң-тусар мана таңһчин арвн дөрвн сурһульд ирлцңгү классмуд секгдв. Тер мет эн җилин йовудт таңһчин арвн дунд сурһульд болн бичкдүдин хойр садт бат ясвр күцәгдхмн. Эн көдлмшиг депутатнр бүрткхмн. Дорас өсч йовдг үйнрт сән медрл өгхин төлә цуг таал тогтагдҗана, – гиҗ таңһчин Толһач Хаска Бату темдглв.
ОЛЬДАН Цаһан