Хог-бог зөөҗ һарһдг шишлң көлгн

Өдгә цагт мана таңһчд хог-богин төр нәрн төрмүдин негнь болна. Таңһчд, нег үлү Элст балһснд эн төр хаһлхин төлә кесг эв-арһс олзлгдҗана.
2024 җилд «СпецАТХ» бүрдәц Элст балһсна медлд орв. Эндр болхла бүрдәц үүлдврән соляд, оңданар көдлмшән күцәхәр шунҗана. Эн туст шин көлгн, шишлң техник болн нань чигн тоот хулдҗ авгдҗана.
Давсн җилин чилгчәр Хальмг Таңһчин Толһачин давулгдсн «Шуд залһлдана» йовудт нег һазра улс хог-богин төрәр кесг сурвран өгв. Энүнәс иштә Хаска Бату ирлцңгү бүрдәцсин мергҗлтнрт шишлң даалһвр өгсн билә.
Бемб өдрлә таңһчин Толһач Хаска Бату залврин Ахлачин дарук Александр Мишаковла болн Элст балһсна һардврин толһач Лиҗикә Алдрла хамдан хог-бог ацҗ һарһдг «РАРЗ» тамһта зурһан хулдҗ авсн шин маши шинҗлҗ хәләв. Шишлң машид Элст балһсна эдлврт орв, энүнә үн 87 сай арслң тогтав. Машид лизингин эв-арһар хулдҗ авгдв, таңһчин хазн болхла эн туст дөңгән күргхмн гиҗ темдглгдв. Рязанск мүҗин Ряжск балһсна автоясврин заводт эн кеҗ һарһгдв, гиҗ келх кергтә. Тенд жилищн-коммунальн эдл-ахун шишлң техник кеҗ һарһна.
– Шин машидлә хамднь хог-бог хайдг 330 шишлң сав бас хулдҗ авгдла. Элстин һурвн микрорайонд эн тәвгдхмн. Шин техник ГЛОНАСС көтлврт орулгдхмн. Элстихн хог-бог кезә, кедү дәкҗ ацҗ һарһсинь ил медҗ чадхмн, – гиҗ Лиҗикә Алдр келв.
Харһлтын йовудт Хаска Бату «СпецАТХ-ан» җолачнрла бас күүндв. Теднә келсәр, шин техник олзлад көдлхд ода амр болв. Цугтан шин машиһәр яһҗ залдгнь дасад авчкв. Җолачнрин тооһас ик зунь арвн һар җилдән көдлҗәнә, көдлмшднь чинртә сольвр орулснднь таңһчин Толһач Хаска Батуд эдн ханлтан өргв.
– Эндр хог-богин төр дара-дарандан хаһлгдҗана. Удл уга шишлң техник дәкәд хулдҗ авгдхмн. Элстин микрорайодар болн уульнцсар хог-богин талвңгуд бас шинрүлгдхмн. Тер мет таңһчин райодт ирлцңгү көдлмш бас бүрдәхәр зүткчәнәвидн. Эн нәрн төриг даавртаһар хамдан хаһлҗ, Элст балһсан болн цуг таңһчан хог-богас цеврүлий, – гиҗ Бату Сергеевич нег һазра улстан үрвр Тиим кевәр хог-богин нәрн төр хаһлгдад йовна. Эн туст һанцхн ирлцңгү бүрдәцсин мергҗлтнр бәәтхә, күн болһн төрскн балһсан чигн, селәһән чигн цеврүлхин төлә тәвцән орулх зөвтә, гиҗ харһлтын чилгчәр аш һарһгдв.
КАРСАНА Евгения