Амрлһна таал ясрулхар

Өдгә цагт балһснд чигн, селәнд чигн әмтнә төлә сән таал тогтахар цуһар шунна. 2024 җилин чилгчәр Хальмг Таңһчин Толһачин «Шуд залһлдана» йовудт ирлцңгү сурврмуд бас орҗ ирв. Элстихн негдгч микрорайона ца бәәдг Колонск боодгин эргндк һазрт сән таал тогтахиг сурсн билә.
Энүнәс иштә Элст балһсна һардврин толһач Лиҗикә Алдрт ирлцңгү даалһвр өггдв. Эндр төсвин зуран бәрмт цаасн белдгдҗәнә.
– Элстин һардвр бәәрн иргнмүдлә харһад эднә тоолврар Колонск боодг ямр кевәр ясгдхинь келв. Бәрмт цаасинь белдәд, шаңһа төвлә күүндәд, немр мөңг йилһхиг сурхвидн. Элст балһсндан сән таал тогтаҗ, амрлһна шин ормс бүрдәхәр шунҗанавидн, – гиҗ Хаска Бату темдглв.